Акафист преподобному Марку Печерскому, гробокопателю

Избранный многотрудниче, угодниче Христов, богоблаженне Марко, в посте, молитве, неустанном бдении вся дни и нощи провождавый, темже велии дары Пресвятаго Духа стяжавый, моли Всевышняго и Пресвятую Деву Богородицу изъяти нас от скорбных обстояний, подати нам спасение необоримое, да со умилением зовем ти:

Радуйся, преподобне отче наш Марко, скорый помощниче и молитвенниче о всех к тебе прибегающих.

Ангелоподобный иноче, безмездный копателю, молитвенныя келлии и смертныя одры приготовлявый, землю на рамах своих носивый, за вся сия Небесную награду ожидавый, людскую мзду убогим раздавал еси. Дивяся таковому твоему усердию, велицей кротости и нестяжанию, взываем ти хвалебне:

Радуйся, всем сердцем Бога возлюбивый;

радуйся, пещерное подвижничество в послушание себе вменивый.

Радуйся, служити миру отрекийся;

радуйся, работати Единому Богу возжелевый.

Радуйся, мир и вся красная его презревый;

радуйся, о горних благах выну помышлявый.

Радуйся, из темных лабиринтов к Богу очи сердца возводивый;

радуйся, дар прозорливости и чудотворения от Него стяжавый.

Радуйся, труды наша на пути спасения облегчающий;

радуйся, к тебе прибегающих скорый помощниче.

Радуйся, ризы безыскусныя носивый;

радуйся, града Киева и Лавры Печерския велелепное украшение.

Радуйся, преподобне отче наш Марко, скорый помощниче и молитвенниче о всех к тебе прибегающих.

Дар, Свыше тебе данный, ты, блаженне отче, до поры скрывал еси, тайныя молитвы Богу вознося непрестанно. Возложиша на пояс себе железо, бодрствовал еси день и нощь в трудах и псалмопениих, не отделяя же всея сея от строгого поста. Воду пил ты мерою из святыя мерки, коею служил тебе медный крест. Темже сподобил тя Господь невидимая зрети и невозможная человеком совершати. Сего ради с благоговением зовем Ему: Аллилуйя.

Сила Божия укрепи тя, преподобне отче Марко, на подвиги духовныя в подземнем раи, идеже возсия благодать Господня на месте варяжских вертепов. Там же яко наставник иноков явился еси. Почитая таковая деяния твоя, всем сердцем воспеваем ти:

Радуйся, житием своим терпению нас научающий;

радуйся, любовь Божию людям показующий;

Радуйся, плодами благочестия украшенный;

радуйся, терпение и незлобие всему миру явивый.

Радуйся, теплый предстательниче наш пред престолом Всевышнего;

радуйся, души отчаянныя ко Христу направляющий.

Радуйся, всехвальне преподобне отче, благими делы братию в ревности о Господе утвердивый;

радуйся, Христа ради железное на теле своем носивый.

Радуйся, сомнение и маловерие из душ смятенных изгоняющий;

радуйся, чистоту и смирение собою являющий.

Радуйся, ангелонравный человече;

радуйся, дивный о Господе подвижниче.

Радуйся, преподобне отче наш Марко, скорый помощниче и молитвенниче о всех к тебе прибегающих.

Нося в чине ангельском иноческий образ, крылатому льву уподобился еси. Яко лев оживляет рыком своих мертвых, тако же и ты смиренными и кроткими речами воскрешал еси усопших иноков. Недоумеваяся о таковом чудесном превращении, взываем Богу Всемогущему: Аллилуйя.

Вкупе со евангелистом Марком и пророком Божиим Иезекиилем, некогда узревшими средь ликов ангельских наделенное крилами львиное подобие, удостоился еси и ты, богоблаженне, поминаем быти наравне с древнейшими наперстники Христа. Мы же, почитающе сия, зовем ти:

Радуйся, со апостолом Марком крылатому льву подобен бывый;

радуйся, Божественного Духа носительниче.

Радуйся, великий чудотворче;

радуйся, благомощный молитвенниче.

Радуйся, свеща неугасимая, в молитвах к Богу ярко горящая;

радуйся, пророка Иезекииля благий последователю.

Радуйся, яко весь во Господе пребывавый;

радуйся, к нему бодренно и неуклонно ученики твоя направлявый.

Радуйся, куколь незлобия на ся возложивый;

радуйся, смирения и послушания зерцало.

Радуйся Пресвятыя Богородицы избранный любимиче;

радуйся, верный исполнителю заповедей Сына Ея и Бога.

Радуйся, преподобне отче наш Марко, скорый помощниче и молитвенниче о всех к тебе прибегающих.

Бурю житейскую, в умах братии мятущуюся, кротостию и незлобием преодолевал еси, блаженне Марко. В благоотишии пещернем богоугодно подвизался еси, наставляя иноков на всяку добродетель. Темже заслужил еси быти почитаем вкупе со Антонием и Феодосием, первоначальниками иночества и монашескаго общежития на Руси. Се ведуще, взываем Богу: Аллилуйя.

Бысть егда, утрудяся телесно, изнемогл еси, оставив место погребения тесным и нерасширенным. Инока, внезапно умерша, никто же не возмог в том неудобном гробе оправити достойно. Тогда ты приказал еси усопшему, взявши сосуд, возлити на себе елей крестообразо. И было по сему. При виде чуда братия, зело роптавшая, объялася смертельным ужасом и трепетом. И мы с благоговением трепещем, воспевая ти:

Радуйся, яко память твоя, не токмо братиею монастырскою величается;

радуйся, помощниче неутомимый скорбящих и нуждающихся.

Радуйся, ходатаю наш у Престола Божия непостыдный;

радуйся, смиренный многотрудниче, кротостию и незлобием многия в вере утвердивый.

Радуйся, даров Божиих преисполненный;

радуйся, беспрекословную любовь к ближним явивый.

Радуйся, послушания рачителю;

радуйся, своими чудесы и предсказании монахов от недоумения и от юродства непотребного спасавый.

Радуйся, трудолюбия правило;

радуйся, подвиги духовными плоть твою духу покоривый.

Радуйся, яко Антония и Феодосиа учеником соделался еси;

радуйся, яко с ними вкупе во славе небесней пребывая, Бога выну о нас грешных умоляеши.

Радуйся, преподобне отче наш Марко, скорый помощниче и молитвенниче о всех к тебе прибегающих.

Еще бысть, егда другое место погребения явилось неготово. Новопреставленного оживив, ты, преподобне Марко, велел еси ему смиренне дожидатися своего часа. Воскресший же, раскрывши очи, не закрывал их целый день и нощь. Наутро же, прикрыв глазницы, предал дух свой в руце Божии и с честью был положен на готовом месте. Новому явлению чудящеся, взываем: Аллилуйя.

Уведевше тя, преподобне Марко, яко чудес творителя и прозорливца, многия усердно тя восхваляху и желаху получити благодать молитв твоих. Ты, по глаголу Божию, никого же отгонял еси, но ревностно спасению молящихся служил еси. Сего ради, воспеваем ти похвальная:

Радуйся, служивый Церкви Божией от трудов твоих праведных;

радуйся, в собственноручно вырытой пещере пристанище спасения получивый.

Радуйся, в молитве непрестанно пребывавый;

радуйся, Лавру Печерскую и священный град Киев молитвенным бдением от бед ограждавый.

Радуйся, претворивый пещерное жилище разбойников в храмы Господа Славы;

радуйся, в подземных кровех главу глубиннаго змия крепко сокрушивый.

Радуйся, преподобне отче, богомудрием высоким преисполненный;

радуйся, наставниче богоносне, дары Духа Святаго преукрашенный.

Радуйся, апостола Марка словеса возлюбивый;

радуйся, всю братию трудолюбию поучавый.

Радуйся, даров духовных всем к тебе притекающим у Господа испрошающий;

радуйся, от всякаго недоумения и нас спасающий.

Радуйся, преподобне отче наш Марко, скорый помощниче и молитвенниче о всех к тебе прибегающих.

Внове воссия слава подвигов твоих, блаженне Марко, егда двоица духовных братий возжеле по смерти во едином гробе возлещи: старший горе, младший низу. Феофилу старшему, из монастыря временно исшедшу, пришла весть о смерти Иоанна, младшего. Вернувшеся и видев свое место занято, старший возопи: «Како можеши на мое место класти младшего?» Ты же, Марко, кротце поклонившеся ему, просил еси умершего ожити и перейти на свое место. И было так. Старший брат, роптавший на блаженного, припал к ногам его, глаголя: «Согрешил я, отче». Се познавше, мы зовем избравшему тя Богу: Аллилуя.

Согрешивый гневом Феофил опечалился зело, рек тебе: «Молю, прикажи брату, чтобы он лег там снова». Ты же отвещал еси: «Сам Господь, уничтожая распрю между нами, сотворил сие. Восставляти мертвых - дело Божие. Я же есмь человек грешный. Но знай и то: негоже, уповая на старшинство, ни в гнев впадати, ни своевольно братскую обитель покидати». Сему дивяся умиленно, поем ти таковая:

Радуйся, смирения любителю;

радуйся, дивная похвало ревностных трудников по Бозе.

Радуйся, роптавшей братии примирителю;

радуйся, мира и тишины во обители насадителю.

Радуйся, ученики твоя от сетей невидимаго врага молитвою твоею соблюдавый;

радуйся, искушенный на мнозе, искушаемым помогавый.

Радуйся, чистое вместилище добродетелей;

радуйся, красное селение Духа Святаго.

Радуйся, смиренно творити добродетели нас научающий;

радуйся, к подвигам благочестия всех призывающий.

Радуйся, кротостию твоею братию и людия мирския удививый;

радуйся, града Киева небесный заступниче.

Радуйся, преподобне отче наш Марко, скорый помощниче и молитвенниче о всех к тебе прибегающих.

Чудо прозорливости явил еси, блаженне Марко, егда велел еси Феофилу готовитися к скорой смерти. Тот же, раздав имущество убогим, уединился в келлии своей, стеня, рыдая и постяся - дабы умилостивити Всевышнего и получити время на покаяние. Се ведуще, молитвенно взываем Богу: Аллилуйя.

От плача преподобный Феофил ослеп, плоть его истаяла до крайности за много дней. Тогда ты, Марко, молвил еси безутешному: «Прости, я пожелал тебе сего, предсказавши скорую кончину, дабы смирити твое плотское высокоумие. Сердца сокрушенна и смиренна Бог не уничижит». Видя таковое исцеление душевное, поем ти:

Радуйся, всехвальне отче, со мудрыми учителеми монашестими в Царствие Небесное вшедый;

радуйся, на путь спасения оттудуже нас призывающий.

Радуйся, скорби людския угашающий;

радуйся, страстьми одержимых от гибели спасающий.

Радуйся, яко многия от неверия отвративый;

радуйся, яко мощи твоя святыя и ныне всех припадающих к ним от всякого злого обстояния спасают.

Радуйся, даже до отшествия твоего ко Господу всех в разуме Христовом наставлявый;

радуйся, день кончины своея предведый.

Радуйся, древним пророком Божиим равночестный;

радуйся, прозорливости благодатныя преисполненный.

Радуйся, чудеса преславна в житии твоем совершивый;

радуйся, Бога прославивый подвиги твоими.

Радуйся, преподобне отче наш Марко, скорый помощниче и молитвенниче о всех к тебе прибегающих.

Наглавие твое честное, яко шлем, укрывает нас от зла, обновляет душу, ограждает от бесовскаго прельщения, лечит от греховных язв. Тебе изрядно послужившее, тысячу лет оно хранило твои помыслы. Мы же, осеняемии сим клобуком, вдохновляемся на подвиги ради Всевышняго, взывая: Аллилуйя.

Клобук архиепископа, шлем воина и куколь схимника объединила есть в себе твоя благая шапка, ею же мы каждодневно осеняеми, получаем силу и надежду на спасение. Ты же, почиваяй с преподобными на Небесех, не остави нас молитвами твоими, буди нам споборник и стена несокрушимая, да зовем ти:

Радуйся, велию власть на духи нечистыя от Господа приявый;

радуйся, людей, стужаемых привидении диавольскими молитвою твоею очистивый.

Радуйся, многия бесноватыя от мучительства демонскаго свободивый;

радуйся, вся привидения и искушения сатанинская победивый.

Радуйся, бесов и колдунов грозно карающий;

радуйся, яко просящих защиты от них и вспоможения не отторгающий.

Радуйся, от мучительства демонскаго многия человеки молитвою твоею свобождаеши;

радуйся, яко исцеления благодатныя от гроба твоего верным подаеши.

Радуйся, победивый враги невидимыя глубоким твоим смирением;

радуйся, низложивый и посрамивый гордыню злобнаго велиара.

Радуйся, в час смертный всем нам благонадежный помощниче;

радуйся, от насилия диавольскаго многомощный нам защитниче.

Радуйся, преподобне отче наш Марко, скорый помощниче и молитвенниче о всех к тебе прибегающих.

Сколь ни старался подкупити тя глубинный змий, ты оставался еси непреклонен, отче наш честный, и ныне ревностно храниши души верных, не предаеши их на гибель, защищаеши от всяких зол. Темже вси, заступничество получившии, вопиют Спасителю: Аллилуйя.

Стена еси твердая и прибежище необоримое молящимся тебе, преподобне отче наш Марко. Сего ради вопием ти: охраняй нас всегда от враг видимых и невидимых, буди заступлением непостыдным и надеждою неизменяемою всем нам, прославляющим тебе глаголы сицевыми:

Радуйся, душевныя страсти умертвляющий;

радуйся, ко спасению всех призывающий.

Радуйся, благочестию и смирению нас научающий;

радуйся, мятущихся и маловерных в вере укрепляющий.

Радуйся, на труд духовный нас воздвигающий;

радуйся, мир Божий в сердца людей приносящий.

Радуйся, дух злобы в сердцах озлобленных угашающий;

радуйся, от сетей вражиих нас избавляющий.

Радуйся, делы благими душу свою украсивый;

радуйся, с лики небесными Творца прославивый.

Радуйся, славы божественныя удостоивыйся;

радуйся, на небеси обитель себе обретый.

Радуйся, преподобне отче наш Марко, скорый помощниче и молитвенниче о всех к тебе прибегающих.

Яко видеста очи твоя пренесение мощей преподобного Феодосиа, ты бо своима рукама их во храме возложил еси, ныне в горнем Иерусалиме, вкупе со великими учителеми пребываеши. Призри и на нас, ты, угодниче Божий, благосердием твоим от всякия напасти защити, от бесовских наваждений и от ран греховных охрани, исцеление подаждь молитвами твоими, да благодарне воззовем ко Господу: Аллилуиа.

Ветия многовещанныя не могут разумети, како ты гласом своим чудеса творил еси, како целомудрием единым, постничеством и смирением неизбывную Божию благодать стяжал еси. Надо всем тем Богородицы лик сияет, Ей же святые молебны вкупе с тобою творяще, из глубины сердец наших зовем:

Радуйся, изрядный слуго Пресвятыя Девы;

радуйся, с Нею вкупе молитися за ны ко Господу дерзновение получивый.

Радуйся, велию власть на диавола от Господа имеющий;

радуйся, вся искушения духов тмы победоносно отражающий.

Радуйся, цвете прекраснейший рая небесного;

радуйся, всем скорбящим благий утешительниче.

Радуйся, целомудрия рачителю;

радуйся, яко и вся Русь Православная тя пред Господом величает.

Радуйся, яко тя гонителем бесов нарицают;

радуйся, яко ты еси Лавры Печерския и града Киева молитвенниче святый.

Радуйся, в горних обителех пребывающий;

радуйся, о нас грешных тамо молящийся.

Радуйся, преподобне отче наш Марко, скорый помощниче и молитвенниче о всех к тебе прибегающих.

Пещеры Лаврския, выну Подземным Небом величавшаяся, и ныне всеми тако величаются, понеже истекает от могил, вырытых тобою, Марко, и позднейшими усердными копателями благодать. В рацех положеннии святии принимают лобызания и молитвенные воздыхания за всех, кто праведным житием своим стяжали от Всевышняго дар чудотворения и посмертного нетления, обаче всех имен подвижников не вемы. Прославляем ныне благодатный сей некрополь паче пирамид египетских и прочих величайших кладбищ мира, вознося в небесный рай молитву: Аллилуйя.

Еретики пытахуся разрушити некрополь, основанный тобою; людие, не веровавшия во благодать святых мощей, потщашася зело вывезти и сожещи нетленные останки преподобных. Однако же посрамлены явилися безбожники и богоборцы: не допустил Всевышний кощунственного разорения, ибо Господь посрамлен не бывает. Припадая же к ракам преблагословенным, из глубины сердец взываем сице:

Радуйся, блаженне Марко, даже по смерти еретическую злобу посрамивый;

радуйся, яко житием своим пещерным ангелов удививый.

Радуйся, о снискании жизни вечныя наш ходатаиче преблагий;

радуйся, яко за Русь Православную, молитвенниче пресвятый.

Радуйся, всем ищущим милосердия Божия всегда помогающий;

радуйся, о всех страждущих и труждающихся молитвы о нас Богу приносящий;

Радуйся, преподобне отче, чудодейственную шапку нам даровавый;

радуйся, под нею же стоящим велию надежду и неиссякаемую помощь подаеши.

Радуйся, изрядный слуго Пречистыя Девы;

радуйся, молитвы усердныя за нас пред нею приносящий.

Радуйся, благоволением Богоматере осененный;

радуйся, откровений Божественных от Нея удостоенный.

Радуйся, преподобне отче наш Марко, скорый помощниче и молитвенниче о всех к тебе прибегающих.

Имуще дар великой благодати Божией, святе преподобне отче Марко, и ныне неоскудно помогаеши всем жаждущим защиты и спасения. Подвиги твоя, многажды воспетыя в летописаниих, запечатленныя на стенах храмов и в изображениих святых икон, вдохновляют нас на житие по Бозе. Ты бо охраняеши и укрепляеши труждающихся, наставляеши заблудших, подставляя рамо крепкое ведущим брань противу духовом злобы поднебесным. Ныне же и нам, тебе молящимся, источи от Бога струи исцеления, да зовем Ему: Аллилуиа.

Чудотворные мощи твоя подают неоскудеваемые исцеления всем с верою притекающим к раце твоей честней, коей место есть в Ближних пещерах велицей Лавры Киево-Печерстей, во единей келлии с любящими братиями Феофилом и Иоанном, вкупе такожде и с преподобным Титом. Прославляем тя сердечно со всеми преподобными Печерскими, глаголя сице:

Радуйся, распинати плоть со страстьми и похотьми научающий;

радуйся, о чтущих память твою ходатаю и покровительниче.

Радуйся, ко гробу твоему притекающим отраду подающий;

радуйся, о спасении Отечества нашего присно ходатайствующий.

Радуйся, учителю монахов, многими чудесы всю братию удививый;

радуйся, со всеми преподобными отцы в Лавре прославляемый.

Радуйся, усердный предстателю, у Престола Божия молитвы о нас приносящий;

радуйся, от насилия диавольскаго многомощный нам защитниче.

Радуйся, Лавры Печерския крепкое ограждение;

радуйся, по Бозе и Богородице непостыдное наше упование.

Радуйся, яко семя твое духовное не оскуде в земли Российстей;

радуйся, яко веселишися со чады твоими во обителех райских.

Радуйся, преподобне отче наш Марко, скорый помощниче и молитвенниче о всех к тебе прибегающих.

О великий чудотворче, богоблаженне отче Марко, смиренне понесый крест жития пещернаго, сокрушивый мерзкую главу внутренняго змия, за вся сия от Бога милость велию приявый, приими от нас, грешных и недостойных, моление сие, к тебе приносимое, огради нас молитвами твоими от наветов духов тьмы и всех, мыслящих нам злая, избави от скорбей и болезней, от злых человек и напрасныя смерти. Ты бо еси молитвенниче и помощниче великий, взывающих к тебе неутомимый в Небе заступниче, да с тобою и мы, ко спасению придя, воспоем всепобедную песнь Богу нашему: Аллилуйя.

О великий и предивный чудотворче, богоблаженне отче наш Марко, всего себе служению Христу отдавый, до изнеможения священныя гробы копавый, монахов на путь правый наставлявый и от грехов нечаянных их ограждавый, услыши нас, молящихся тебе, яви на нас любовь свою, умоли Всевышнего Бога и Пресвятую Деву Богородицу избавитися нам от всякого злаго обстояния и от геенны огненной, да безболезненно и непреткновенно войдем в чертоги Господа нашего Иисуса Христа и сподобимся вкупе с тобою во Царствии Небеснем пети Ему: Аллилуиа.