Акафист святому апостолу и евангелисту Марку

Преславних апостол Петра и Павла соратниче, струями Благодати Господней напоивши обильне концы мира, святый апостоле Марк, призри ныне на ны, чтущия усердно память твою! Укрепи сердца наша Троическою верою, исполни нас духа премудрости, научи разума, обрати во учеников своих, да непрестанно поем благодарственная тебе, во умилении зовуще:

Радуйся, святый апостоле Марк, во Евангелии Христа проповедниче!

Мира Создателю, Христос Бог, падшее во тьму человечество, Светом Нетленным просвещати желая, тя, блаженне апостоле Марк, из дома матери твоея Марии во граде Иерусалиме на служение Себе призва, на делание спасения нашего во многи земли иудеом и еллином Христа Распятаго, Божию Силу и Божию Премудрость проповедати послав. Темже и мы, светом учения твоего озаряеми, сердцем и усты к тебе сице вопием:

Радуйся, из еврейска колена Левиина родивыйся,

радуйся, от племени священнического Богом избранный,

радуйся, в доме матери своея Марии, апостольском прибежище, свет узривый,

радуйся, еврейски Иоанном нареченный, латинское имя Марк во славу Бога просветивый,

радуйся, обычаи родительские почитавый,

радуйся, измлада истинную простоту возлюбивый,

радуйся, от юности украшенный добродетельми,

радуйся, к вере и упованию на Бога нас призывавый,

радуйся, святый апостоле Марк, во Евангелии Христа проповедниче!

В соборные труды созывающе иерусалимлян верующих и апостол Божиих, дом матери твоея, святый апостоле, тебе ковчегом духоносным и назидательным стал, обаче и мы соборность церкви Господней почитаем, усердно поя: Аллилуиа.

Разум Божественный имея, при жизни земной в церкви Града Господня сугубо чтимый, твой дядя Варнава, апостоле Марк, «муж добрый и исполненный Духа Святаго и веры», Троическим Промыслом к апостолу Павлу в доме матернем тебя приблизивый, за таковое и мы с благоговением умиленно вопием сицевая:

Радуйся, апостолу Варнаве по плоти и о Бозе сродниче,

радуйся, в доме матернем первоверховных апостол Петра и Павла сретевый,

радуйся, первоверховных апостол Петра и Павла учениче став усердный,

радуйся, Духа Святаго обогативыйся от апостол первоверховных,

радуйся, яко сам стал еси обиталищем Пресвятаго Духа,

радуйся, украшение целомудрия,

радуйся, от Господа жребий апостольства улучивый,

радуйся, благовестия трубо, основания ветхаго мира сокрушивый,

радуйся, святый апостоле Марк, во Евангелии Христа проповедниче!

Силою свыше укрепленнии, в первый путь из Антиохии к иудеом и волхвом с апостолы Павлом и Варнавою послани Господом бысте, тебя, святый апостоле и евангелисте, с собою взявше, нам же укажи стезю ко Господу, вопиющих: Аллилуиа.

Имуще премудрость шествовати за старшими апостолы, ты святителю Марк, остров Кипр с востока на запад прошед проповеда, тем убо и наша души, омраченныя мраком страстей ко Свету Господню просвети, да восхвалим ти тако:

Радуйся, свидетелем став поражения слепотою волхва Вариисуса по слову апостола Павла,

радуйся, в Малую Азию из Кипра со апостолы Павлом и Варнавою прошествовавый,

радуйся, дерзающий Промысел Божий исполняти, из Пергии во Иерусалим возвративыйся,

радуйся, во Святом Граде ко апостолу Петру присоединивыйся,

радуйся, со апостолом Петром в Рим от дома матернего шествовати вознамеривыйся,

радуйся, Церковь Православную во граде Риме апостолу Петру содействующе, утвердивый,

радуйся, напоивый землю римскую струями Божественных вещаний,

радуйся, множество язычников римских воинами Христовыми утвердивый,

радуйся, святый апостоле Марк, во Евангелии Христа проповедниче!

Сладчайшего Учителя ты паче всех благ земных возлюбил еси, яко устремился возвестити Его о шествии Иуды со стражники, наготу плоти своея успев покрыти токмо покрывалом, научи и нас чрез все житие ко Спасителю свои стопы устремляти, вопияше Ему: Аллилуиа.

Слышаша, Богомудре Марк, ближнии и дальнии римляне из уст твоих о Господе, ревностно возжелали в письменах обрести слово Божие, мы же к их мольбам благодарственно вопием ти:

Радуйся, в дни различны от апостола Петра слышанное во Евангелие изложивый,

радуйся, Евангелие тобою писанное, второй книгой Завета Господнего ставшее,

радуйся, Чудесами Божественными во Евангелие Силу Троицы Святой показавый,

радуйся, явлением Иоанна Крестителя благовествование о Господе начавый,

радуйся, проповедь из пустыни Иудейской в пустыню всей земли принесый,

радуйся, яко рыкающему льву глас вопиющего в пустыни уподобивый,

радуйся, сам со львом в Церкви Христовой показуемый,

радуйся, непоколебимый столпе, твердо содержавый сущих в вере,

радуйся, святый апостоле Марк, во Евангелии Христа проповедниче!

Свершивше труды апостольские в Риме, исполняя смиренно чрез апостола Петра послушание Господне – даровати иным землям Слово Божие, апостоле Христов Марк, научи смирению и послушанию нас грешных, поющих: Аллилуиа.

Не ищуще славы себе, но ревностно благовествуя во Славу Христову, святый апостоле Марк, дерзнувый во град императоров войти, тебе мы, многогрешнии, хвалу воспеваем:

Радуйся, из Рима в Аквилею для проповеди Слова Божия пришедый,

радуйся, во граде, возлюбленном императорами, о Христе Распятом благовествовавый,

радуйся, Аквилею, златом с Римом равной, Нетленным Златом Слова Божия озаривый,

радуйся, воды моря Адриатического водами Иорданскими утвердивый,

радуйся, сокровищами духовными богатства Аквилеи посрамивый,

радуйся, в граде сем Церковь Христову основавый,

радуйся, всем сердцем Иисуса, Сына Божия возлюбивый,

радуйся, с усердием Святой Троице земно послуживый,

радуйся, святый апостоле Марк, во Евангелии Христа проповедниче!

Боготечной звезде подобен был еси, апостоле Марк, с радостию во иудейский и языческий Египет Евангелие Христово понесший, научил еси неверных веровати в Троицу Единосущную и купно с тобою воспевати: Аллилуиа.

Подобно Моисею, некогда возвестившему сыном Израилевым избавление от ига фараонова, ты из апостол первым, евангелисте Марк, во Египте возвестил свободу от рабства диавола, мы же, чтущи память твою, умиленно поем:

Радуйся, великое множество жен и мужей иудейских во Египте ко Христу приведый,

радуйся, зерна Евангелия в уготованную законом Моисеовым землю всадивый,

радуйся, утверждение Веры Христовой,

радуйся, столпе Церкви Божия,

радуйся, в Александрии Египетской Церковь Христову возведый,

радуйся, насадителю истинного Богопочитания,

радуйся, светило Веры Православной,

радуйся, всего рода христианского украшение,

радуйся, святый апостоле Марк, во Евангелии Христа проповедниче!

Воззрев апостоле Марк, во образе человечестем Владыку мира и Сына Божия, от первоверховных апостол откровение о Господе возлюбивый, сего ради и мы, исповеданию твоему внявше, поем тако: Аллилуиа.

Разум неуразуменный вразумляя о Святей Троице, поборниче исповедания православныя веры, святый апостоле Марк, из Антиохии со святыми Павлом и Варнавой шествовати во вторый путь с проповедью Христовой вознамеривыйся. Сего ради вернии научишася воспевати тебе:

Радуйся, Промыслу Божию на тебе по исходе из Антиохии свершившемуся,

радуйся, шествовати далее купно, отказ апостола Павла получивый,

радуйся, с дядею своим апостолом Варнавою в Кипр возвративыйся,

радуйся, в сени дома родительского от странствий до времени почивавый,

радуйся, богоозаренный исповедниче неизреченныя Божественныя славы,

радуйся, мир вещанием воплотившегося Божиего Слова озаривый,

радуйся, мрежею благодати нас из сует мира любовию возводящий,

радуйся, учений небесних благовещанный сказателю,

радуйся, святый апостоле Марк, во Евангелии Христа проповедниче!

Тайнам Царствия Божия наученный, паки во Египте благовествуя, апостоле Марк с апостолом Петром сретивыйся, омраченныя грехми души наша просвети, да воспрянем еже пети Богу: Аллилуиа

Весь огнем Божественныя любве исполненный, в терпении стяжав Дух Святый, Богом водимый десницей своею Евангелие Господне написуя, апостоле Марк, со апостолом Петром в Вавилоне для трудов новых сретивыйся, мы же, любовию твоею побеждаеми, дерзаем звати тебе таковая:

Радуйся, апостолу Петру усердно подражавый,

радуйся, с апостолом Петром Церковь Христову в Вавилоне египетском создавый,

радуйся, в храме том апостол Петр первое послание к малоазийцам сотворивый,

радуйся, друже вратаря Райского, ответшего Спасу: ты еси Христос, Сын Бога Живаго!

радуйся, собратом став Апостолу, ключи Царствия Небеснаго стяжавшего,

радуйся, Христово Евангелие в себе воплотивый,

радуйся, ко свету Тайн Божиих приницающий,

радуйся, слова Божия усердный изъяснителю,

радуйся, святый апостоле Марк, во Евангелии Христа проповедниче!

Силою свыше осененный, апостоле Марк, гонителей святой веры неустрашившеся, благовестнические труды заточенного во узы в Риме апостола Павла разделивый, Веру Христову велегласно прославляя, темже пояху Богу : Аллилуиа

Вития многовещанныя не довлеют изглаголати чистоту духовную, юже имел ты, апостоле Марк, и нас научи вере крепцей, с любовию зовущих ти:

Радуйся, Павлом, во дни заточения, Колоссянам о тебе писавшем, яко о своем утешителе,

радуйся, им же сотрудником своим для Царствия Божия нареченный,

радуйся, просьбу апостольскую шествовати из Рима в Малую Азию исполнивый,

радуйся, во фригийский град Колоссы пришедый,

радуйся, лжеучителям, прельщавшим колосских христиан, противодейственниче,

радуйся, иудеев и еллинов просветителю,

радуйся, тридневнаго смерти и Воскресения Божества благовестителю,

радуйся, кротости и воздержания учителю,

радуйся, святый апостоле Марк, во Евангелии Христа проповедниче!

Спасти хотя род человеческий, сам благовестником на стезех Божиих ставый, в прилежном послушании апостолу Павлу верен до конца бывый, поя Троице Пресвятей: Аллилуиа

Царя Небеснаго, Егоже славословят Херувимы и Серафимы, житием, верою и любовию всеусерднейший служитель был еси, апостоле Марк, первоверховным апостолом Павлом пред кончиною его во узах был призванный, тем радостно зовем ти:

Радуйся, послание апостола Павла к Тимофею исполнивый,

радуйся, со апостолом Тимофеем из Малой Азии в Рим на помощь Павлу поспешивый,

радуйся, свидетелем мученической кончины обоих учителей своих явивыйся,

радуйся, великого апостола Павла, римского гражданина, усекновенным узривый,

радуйся, первоверховного апостола Петра, распятым на кресте созерцавый,

радуйся, плоть свою ко страданиям за Христа уготовавый,

радуйся, слезы за грехи людские пред Господом пролиявый,

радуйся, учителей своих в Царствии Божием встретивый,

радуйся, святый апостоле Марк, во Евангелии Христа проповедниче!

Пение Пресвятей Троице с первоверховными апостолы воздал еси, апостоле Марк, словом, умом и живым всего себе в жертву принесением: подражая бо Распятому за ны непорочному Агнцу Христу, положил еси душу свою за други своя волею. Темже благодарни суще, поем Дивному во святых: Аллилуиа.

До последнего часа своего научати Любви Господней и Слова Божия устремленный, апостоле Марк, паки во Египет после убиения учителей своих стопы направивый, просвещаеши бо сердца верных и к разуму Божественному вся наставляеши, поучая и нас весело взывати:

Радуйся, во Египет воздвигнутый тобою храм благоустраивать направивыйся,

радуйся, в Александрии средоточие греческого учения в знатном книгохранилище во славу Христову употребивый,

радуйся, иудеев, увлекшихся греческой ученостью, к знаниям христианским приведый,

радуйся, христианское училище в Александрии основавый,

радуйся, училище сие, знаменитыми учительми и отцами церкви прославивший,

радуйся, в заботах о службах церковных, чин Божественныя Литургии составивый,

радуйся, из Александрии проповедать Христа в Африку, Ливию и иным языкам путь предприявый,

радуйся, во Египте проповеди твои вровень с млеком матери христиане употребиша,

радуйся, святый апостоле Марк, во Евангелии Христа проповедниче!

Благодать Божия соблюдаше тя, апостоле Марк, аки Петр и Павел Евангелие возвещал еси, Словом Христовым верныя утешая. И тако упасл еси Церковь даже до дне, егда язычники злые в храм ворвавшиеся с намерением погубити тя, неустанно взывал ко Господу: Аллилуиа.

Поюще многотрудныя подвиги за Христа, всехвальный апостоле Марк, хвалим евангельския труды твоя, ублажаем мученическую кончину, почитаем священную память твою и в похвалу сицевая тебе зовем:

Радуйся, первый епископе Церкви Александрийской,

радуйся, Александрии первомучеником явленный,

радуйся, эллинское божество Сераписа Святою Пасхою разрушивый,

радуйся, в праздник Христовой Пасхи эллинами умученный,

радуйся, Ангелом Господним в темнице на подвиг укрепленный,

радуйся, истерзанный, вслед за Ангелом от Самого Господа утешение приявый,

радуйся, во вторый день лютою толпою дорогами града влаченный, дух от мук испустивый,

радуйся, яко тело твое, не дал еси Господь огнем сожещи, громом с молнией злорадных эллинов вразумляя, и христианом пречистую плоть погребати благословивый,

радуйся, святый апостоле Марк, во Евангелии Христа проповедниче!

О всехвальный благовестниче апостоле и евангелисте Марк! Внемли убо воздыханию сердец наших, молящихся тебе, учителю и архипастыре, много бо может молитва святых апостол пред Богом: научи нас потщитися и памятовати о небеснем звании и христианстей кончине жизни нашея, привлецы ны ко сладости евангельския истины, свяжи узами любве Христовы, да мы вси, отвергшеся нечестия и мирских похотей, внидем в радость Господа нашего, поюще ему с тобою и со всеми апостолы: Аллилуиа.

О, преславный апостоле и евангелисте Марк, душу за Христа предавый и кровию твоею пажить Его удобривый! Узри на нас, чад Господним многогрешных, всех зде ныне стоящих и молящихся (имярек) молитвы и воздыхания сердцами сокрушенными ныне приносимыя.

Се бо беззаконьми омрачихомся, и того ради бедами, якоже тучами, обложихомся, елеа же добраго жития обнищахом зело, и не возможем противитися волком хищным, иже расхищати наследие Божие дерзостно тщатся.

О, всехвальный апостоле и евангелисте Марк! Просвети нас Светом Святаго Евангелия Господня, вразуми истребить немощи наша, помоги не отлучатися от Господа Спаса нашего, да не разлучимся в конец от любве Божия, но крепким заступлением твоим нас защити, да помилует Господь всех нас молитв твоих ради, да вразумит Словом Своим и рукописание безмерных грехов наших истребит, и да сподобит со всеми Святыми Апостолы во блаженном Царствии воспевати Пресвятую и Нераздельную Троицу, Отца и Сына и Святаго Духа, и ныне и присно и вовеки веков! Аминь.