Канон молебный Господу Иисусу Христу
Ирмос: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема Бо́гу побе́дную песнь пои́м вопия́ше.
Припев: Ми́лостиве Го́споди, услы́ши моли́тву раб Твои́х, моля́щихся Тебе́.
О́бщий плач соста́вим, бра́тие, во́зраст весь же, чин, род и пле́мя, и го́рце воздохне́м вку́пе, и всех Творца́ ми́лостива сотвори́м. Ми́лостиве Го́споди, услы́ши моли́тву раб Твои́х, моля́щихся Тебе́. Благоутро́бия ра́ди ми́лости приве́д, от не су́щих, Влады́ко, естество́ дре́вле тле́нных, и обетша́вшее спасл еси тле́ния, погиба́ющих, ны́не нас поми́луй. Ми́лостиве Го́споди, услы́ши моли́тву раб Твои́х, моля́щихся Тебе. Свяще́нствовать Свою́ кровь, Сло́во Бо́жие, умира́еши я́ко челове́к, Бог Сый, нас ра́ди. Но мы, благода́ти стра́шныя Твоея́ отступа́юще, зле ны́не отринове́ни бы́хом.
Слава Отцу, и Сыну, и Святому Духу.
Зако́нов Твои́х отрица́ющеся и уста́вов, Христе́ Бо́же, безсту́дне естество́ оскверня́юще, досто́йныя подъе́млем я́звы, стихи́ям есте́ственнаго изсту́пльшим чи́на.
И ныне и присно, и во веки веков. Аминь.
Богородичен: У́жаса и колеба́ния, и стра́ха вся испо́лнь, пра́ведный зря́щи Влады́ки гнев. Но Сего́ ми́лостива нам, яко Сы́на Своего́ и Бо́га, соде́лай Влады́чице.
Ирмос: Несть свят, я́коже Ты, Го́споди Бо́же мой, вознесы́й рог ве́рных Твои́х, Бла́же, и утверди́вый нас на ка́мени испове́дания Твоего́.
Припев: Ми́лостиве Го́споди, услы́ши моли́тву раб Твои́х, моля́щихся Тебе́.
Ада́м пе́рвую за́поведь Твою́ дре́вле преслу́шав, Рая изгна́н бысть, и жи́зни, и Бо́га. Мы же всех вку́пе отсту́пльше, ны́не умерщвля́емся. Ми́лостиве Го́споди, услы́ши моли́тву раб Твои́х, моля́щихся Тебе́. Столп пре́жде яви́ся лука́в, Ка́ин за́висти злы́я, бра́та уби́в. Ему́же ревну́юще ны́не мы, стена́ти и трясти́ся зле я́коже он, вси осужде́ни бы́хом.
Ми́лостиве Го́споди, услы́ши моли́тву раб Твои́х, моля́щихся Тебе. Зле тварь на ны, звери́тся и зло́бит чрез естество́, дви́жущи ополче́ния есте́ственная, Бо́жий влады́чний гнев пра́ведный всем возвеща́ющи.
Слава Отцу, и Сыну, и Святому Духу.
Скры́ся, Влады́ко Христе́, со́лнечная све́тлость, удержа́ся тече́ние обы́чных дожде́в, су́ша и тма де́ржит, Ты же, Сла́вы Со́лнце, отврати́ся.
И ныне и присно, и во веки веков. Аминь.
Богородичен: Кре́пость несть в нас, вся́каго же дерзнове́ния обнаже́ни бы́хом, вси де́лы скве́рными. Ты же, яко Ма́ти Чи́стая, пременя́еши Влады́ку всем.
Господи, помилуй. (Трижды.)
Ирмос: Христо́с моя си́ла, Бог и Госпо́дь, честна́я Це́рковь боголе́пно пое́т, взыва́ющи от смы́сла чи́ста, о Го́споде пра́зднующи.
Припев: Ми́лостиве Го́споди, услы́ши моли́тву раб Твои́х, моля́щихся Тебе́.
День, Влады́ко, гне́ва и ско́рби, и не бе день сей, ниже́ нощь. И́же ны́не пости́же всех нас проро́чески, и несть избавля́ющаго. Ми́лостиве Го́споди, услы́ши моли́тву раб Твои́х, моля́щихся Тебе́. Содо́мляном пе́рвее зле разве́рзе небеса́, вопль умно́жися. Сих же затворя́ет согреше́ний мно́жество, ны́не нам в пра́вду, Влады́ко.
Ми́лостиве Го́споди, услы́ши моли́тву раб Твои́х, моля́щихся Тебе́. Угасе́ со́лнце, о́блацы, Влады́ко, чрез естества́ удержа́ша дождь. Земля́ же, стеня́щи, страши́тся обнаже́ния своего́, и ка́зни предзря́щи.
Слава Отцу, и Сыну, и Святому Духу.
Ви́дя, Влады́ко, виждь озлобле́ние люде́й Твои́х, и во́нми стена́нием. Ма́нием уста́ви бу́рю, и ду́ховом сопроти́вным запрети́.
И ныне и присно, и во веки веков. Аминь.
Богородичен: Утаи́вшися пер́вее боле́зней, родила́ еси́ всех Влады́ку па́че естества́. Его́же ра́ди боле́знь разреши́, Чи́стая, Свои́х люде́й, уста́виши бу́рю.
Ирмос: Бо́жиим све́том Твои́м, Бла́же, у́тренюющих Ти ду́ши любо́вию озари́, молю́ся: Тя ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Припев: Ми́лостиве Го́споди, услы́ши моли́тву раб Твои́х, моля́щихся Тебе́.
Утесне́на мя всю́ду, Дави́д зря гряду́щ гнев Бо́жий, возопи́. Мы же что сотвори́м, окоя́ннии, простра́нными обре́тшее, те́сно оби́телище. Ми́лостиве Го́споди, услы́ши моли́тву раб Твои́х, моля́щихся Тебе́. Руки́ я́коже изба́вль фарао́ни дре́вле лю́ди Своя́, Благи́й, разве́рз напра́сно бе́здну, и нас пога́нских рук исхити́, и мо́ре ути́шив, ве́тры укроти́.
Ми́лостиве Го́споди, услы́ши моли́тву раб Твои́х, моля́щихся Тебе́. Быстрота́м ну́жди, и злых воста́ней, волна́м и духово́м сопроти́вным запре́ти, и во ути́шие да прии́дут Твои́м повеле́нием, и де́рзость да уста́вится вся́ка, Человеколю́бче.
Слава Отцу, и Сыну, и Святому Духу.
Ти́на и смрад сласте́й, и вся́ческих согреше́ний нас покры́ша во́лны, сего́ ра́ди разды́шут зе́лне Боже́ственнаго гне́ва во́лны, и всех нас потопля́ют.
И ныне и присно, и во веки веков. Аминь.
Богородичен: И́же дре́вле, Влады́чице, Тобо́ю изба́вльшиися сме́рти и тли, пога́нския ну́жды и ско́рби, и ны́не сия разреши́, мо́лимся, лю́дие бо Твои́, и достоя́ние мы есмы́ изря́дное.
Ирмос: Жите́йское мо́ре, воздвиза́емое зря напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли живо́т мой, Многоми́лостиве. Ми́лостиве Го́споди, услы́ши моли́тву раб Твои́х, моля́щихся Тебе́.
Припев: Пло́ти пе́рвее послужи́вшии, пре́дани бы́ша скве́рно, потопле́нию безу́мнии, и́мже мы поревнова́вше ны́не зле, пло́ти бы́вше тле́ние возвра́тне подъя́хом.
Ми́лостиве Го́споди, услы́ши моли́тву раб Твои́х, моля́щихся Тебе́. Пути́ отврати́вшеся пра́ваго, развраще́нным путе́м хо́дим, отсту́пльше безу́мне Твои́х за́поведей, его́же ра́ди и во глубины́ искуше́ний многоплете́нных впада́ем.
Ми́лостиве Го́споди, услы́ши моли́тву раб Твои́х, моля́щихся Тебе́. При́зри свы́ше я́ко ще́др, Бо́же, стена́ние услы́ши, и слеза́м во́нми Твои́х люде́й. Отроча́т пою́щих Ти гла́са не пре́зри, Многоми́лостиве.
Слава Отцу, и Сыну, и Святому Духу.
Из уст пе́рвее, Влады́ко, младе́нческих, я́ко Бог па́че естества́ хвалу́ соверши́л еси́, и сим во́нми, и приими́ мольбу́ похвала́ми о́нех воздая́ние творя́.
И ныне и присно, и во веки веков. Аминь.
Бо́жия Ма́ти Влады́чице бы́вши, де́ржиши всю све́тло тварь, изря́днее же мы стяжа́ние Твое́: его́же ра́ди предвари́вши, изба́ви гла́да и пога́ных Твое́ ста́до.
Господи, помилуй. (Трижды.) Слава и ныне:
Ирмос: Росода́тельну у́бо пещь соде́ла А́нгел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших.
Припев: Ми́лостиве Го́споди, услы́ши моли́тву раб Твои́х, моля́щихся Тебе́.
Я́коже вдови́цы глад, дре́вле разреши́л еси́ посла́в Илию́, Влады́ко, проро́ка Своего́, си́це разреши́ сло́вом, и нам су́шу и глад, я́ко благ, напита́в обы́чне Свои́х, люде́й, и́же отце́м Бо́же благослове́н еси́. Ми́лостиве Го́споди, услы́ши моли́тву раб Твои́х, моля́щихся Тебе́. Умерщвле́на сы́на саре́фтяныни пре́жде воздви́же проро́к Твой, дождь подава́й земли́, увя́дшей зле.
Ми́лостиве Господи, услыши молитву раб Твоих, молящихся Тебе. Мно́жеством бла́гости долготерпе́, всех прегреше́ния презре́в ны́не, Своя́ гра́ды напита́й и лю́ди, моли́твами Пречи́стыя Твоея́ Ма́тере, обдержа́щих напа́стей, разреши́в напра́сных нам.
Слава Отцу, и Сыну, и Святому Духу.
Ли́це Тя а́нгельстии мо́лят, Человеколю́бче, изба́ви лю́ди и град Твой вся́кия ско́рби. И пога́ных мно́жества нечести́вых низложи́.
И ныне и присно, и во веки веков. Аминь.
Богородичен: В напа́стех яви́ся, мо́лимся, Изба́вительнице в ку́пе и Предста́тельнице, чту́щим Тя, напа́стей и ско́рбей злых, и де́рзости безбо́жных и нечести́вых враго́в избавля́ющи, держа́вною Твое́ю руко́ю, Влады́чице.
Ирмос: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся бо твори́ши, Христе́, то́кмо е́же хоте́ти. Тя превозно́сим во вся ве́ки.
Припев: Ми́лостиве Го́споди, услы́ши моли́тву раб Твои́х, моля́щихся Тебе́.
Го́рдый нрав ны́не смири́м, грабле́ния и льсти вси отбежи́м, кля́твы от души́ со лже́ю возненави́дим. Я́ко да Влады́ку ми́лостива вси обря́щем. Ми́лостиве Го́споди, услы́ши моли́тву раб Твои́х, моля́щихся Тебе́. Слове́сни бы́вше, безслове́сни яви́хомся, о́браз боже́ственный и сан, де́лы скве́рными неподо́бне обезче́стивше. Спаси́, я́ко Щедр, моли́твами святы́х Твои́х.
Ми́лостиве Го́споди, услы́ши моли́тву раб Твои́х, моля́щихся Тебе́. Я́ко блудни́цу, Христе́ мой, пре́жде и блу́днаго, я́ко разбо́йники и мы́тари мно́ги спа́се, я́коже Манасси́ю помо́льшася спасл еси́, всех нас спаси́, моли́твами святы́х Твои́х.
Слава Отцу, и Сыну, и Святому Духу.
Младе́нствующии язы́цы, ю́нии и ста́рцы, и́ноцы, и спряже́нии, вси мо́лимся, разреши́ гнев, ве́тром запрети́, дождь пода́ждь земли́, Христе́, жа́ждущей.
И ныне и присно, и во веки веков. Аминь.
Богородичен: Душе́ю и те́лом уя́звлени вси, де́лы скве́рными, я́звами пе́рвыми, притеце́м вку́пе, Влады́чице припаде́м, я́ко да премени́т нам, всех Зижди́теля.
Ирмос: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Припев: Ми́лостиве Го́споди, услы́ши моли́тву раб Твои́х, моля́щихся Тебе́.
Приими́ мольбы́ я́ко Бла́га, к Тебе́ прибега́ющих, и хода́таица нам бу́ди. Предста́ни, Госпоже́, и боле́зни разреши́, я́ко Ма́ти, мо́жеши бо вся, Влады́чице. Ми́лостиве Го́споди, услы́ши моли́тву раб Твои́х, моля́щихся Тебе́. Созда́л еси́ сих, Сы́не, рука́ми, и воздви́гл еси́ уме́рших, и препита́л еси́ Свои́м Те́лом. Ма́терь же Тя от сих па́че естества́ соде́ла пра́ведну. Его́же ра́ди приими́ ми, Сло́ве, мольбу́. До́лжное творя́, Ма́ти ны́не про́сиши ми́лости. Не́киим спеши́ши е́же от мене́, недосто́йни си человеколю́бия вся́каго, Боже́ственному милосе́рдию солга́вше.
Ми́лостиве Го́споди, услы́ши моли́тву раб Твои́х, моля́щихся Тебе́. Вем се, Влады́ко и Сы́не, но раска́явшеся, ны́не припа́дают, я́коже зри́ши, пла́чут и рыда́ют, растерза́ются вси. Не терплю́ утро́бою,сих наказа́ния.
Слава Отцу, и Сыну, и Святому Духу.
Зна́ют, Ма́ти, и я́звы чу́вствуют ны́не, прелага́ют же ся зле. Аз же Тебе́ благода́ть сию человеколю́бне, ны́не обы́чно я́ко Ма́тери да́рую.
И ныне и присно, и во веки веков. Аминь.
Богородичен: Па́че сло́ва, Сло́ве, вся Твоя́, воплоще́ние и страда́ние, и обоже́ние стра́шное. Бога́тство вели́кое, о́бщаго покая́ния, и́хже ра́ди поклоня́емся Сы́ну, сла́ве Твое́й.