Канон Нерукотворному образу Иисуса Христа
Пречистому образу Твоему покланяемся, Благий, просяще прощения прегрешений наших, Христе Боже: волею бо благоволил еси плотию взыти на крест, да избавиши, яже создал еси, от работы врагу. Темже благодарственно вопием Ти: радости исполнил еси вся, Спасе наш, пришедый спасти мир.
Ирмос: Яко по суху пешешествовав Израиль по бездне стопами, гонителя фараона видя потопляема, Богу победную песнь поим, вопияше.
Припев: Слава Тебе, Боже наш, слава Тебе.
Плотски изобразитися по нам, Иже прежде Безплотный, благоволением Отчим, не отвергийся зрака, дарова нам Божественное изображение.
Слава Тебе, Боже наш, слава Тебе.
Неизменное естество, Отчий предел известнейший, в человеческую плоть пришедый свойства на земли оставил есть нам, возшедый на Небеса.
Слава Тебе, Боже наш, слава Тебе.
Колеблемое лестию сопротивных достояние Твое оправдал еси Христе, честными Твоими сие утвердив страстьми, и зрака изображением.
Слава: Подобаше принестися к Царствующему всеми грады, Небесе и земли Царя образа начертанию, еже Он воплощейся самодетельно омочил есть, царя и христолюбивых поспешеньми.
И ныне: От чистых Твоих ложесн преестественне плоть заимствовавый, Иже всем подаяй еже быти человеком, Пренепорочная, видящеся, не отступль, идеже бе первее.
Ирмос: Несть Свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Слава Тебе, Боже наш, слава Тебе.
Одеждею добродетелей одеял еси, Спасе, честную Церковь, подвигнув царево сердце, защищение взыскати Твоего подобия.
Слава Тебе, Боже наш, слава Тебе.
Обнажити хотя добрая, и временем умалити, иже зависти родитель, рукам скверным сия предаде безстудне, но обличися, всуе помышляя.
Слава Тебе, Боже наш, слава Тебе.
Светло радовашеся иногда Давид, ликуя пред кивотом святым, и ныне скиптры прием управляти царския, множае радуется Божественному изображению.
Слава: Тебе, создавшему человека по образу первее, во еже вообразился еси абие за милосердие, тем приемша Тя воистинну подобие неизменное, со Ангелы, Христе, славим.
И ныне: Из корене всяко отсещи праотца хотяй Твой Сын, Дево, прозябшее преслушание, из чрева Твоего, Чистая, приемлет все человеческое.
Едесский царь всех Царя, не скиптры, ниже вои, но множества чудес словом износящаго, познав Тя, моляше богочеловечное к себе получите, во образе же яко узре Тя, взываше: Бог Ты и Господь.
Ирмос: Христос моя сила, Бог и Господь, честная Церковь боголепно поет взывающи, от смысла чиста, о Господе празднующи.
Слава Тебе, Боже наш, слава Тебе.
Сладкое убо солнце, озаряющее очеса, сладчайшее же зрение Твоего, Христе, подобия, яко то убо чувственная, сие же умная свет озаряет.
Слава Тебе, Боже наш, слава Тебе.
Крепость оскуде исмаильтеская: десницы бо оружия крестнаго все ограждение державномудренный царь в своей земле положи.
Слава: Князи вси и судии земли, благословите Христа с первосвященники и святители днесь и всеми людьми, Того зрения сподобльшиися.
И ныне: Соблюденну быти Твоему граду, Пречистая, невредимо, от нашествия варварскаго, молися, молимся, се бо колико нань наветницы созидают.
Ирмос: Божиим светом Твоим, Блаже, уренюющих Ти души любовию озари молюся: Тя ведети, Слове Божий, Истиннаго Бога, от мрака греховнаго взывающа.
Слава Тебе, Боже наш, слава Тебе.
Мал Тебе град приятелище древле предуготова Христе, егоже Фаддея пришествие недуг пременяет, и руки Твоея писание и Божественное напечатание лица Твоего.
Слава Тебе, Боже наш, слава Тебе.
Благодатей Твоих дарования, Христе, преумножишася: яже бо первее Едес недрствовавши хвалящеся, новый же приемши Рим, радуется.
Слава: Очи Господни на праведныя цари, и уши на молитву царей благочестивномудрствующих, чтущим Его подобие благолепно самописанное.
И ныне: Устави, Дево, врагов настояния частая, разруши советы их, достоянию Твоему помози: зриши бо, яко отчаяхомся озлболеннии.
Ирмос: Ят бысть, но не удержан в персех китовых Иона: Твой бо образ нося, Страдавшаго, и погребению давшагося, яко от чертога от зверя изыде. Приглашало же кустодии: хранящий суетная и ложная, милость сию оставил есте.
Слава Тебе, Боже наш, слава Тебе.
Краснейший добротою, Спасе, паче всех сынов человеческих: аще бо ни видения имяше, ниже доброты во время страсти, но сущим вся просвещаше, и являше Твоего зрака видение. Егоже подобия на обетшавшем руне изображение, якоже сокровище нам даровася.
Слава Тебе, Боже наш, слава Тебе.
Крепости нанесенныя от агарянскаго множества, якоже от иноплеменных кивот Израилю новому, лица Твоего ныне к сему даде изображение Твое, Христе, и славу, юже стяжа: ниже бо подобаше лже, святая псом предпометати.
Слава: Не ведущу о Царствии Твоем Небеснем, к немуже нас, Благий, из тленных и долу лежащих возвел еси, Иже невещественными Херувимы неприступен снизшел еси даже до ада, Твоего апостола ко Авгарю, Христе, послал еси, таинственно умудряюща.
И ныне: От крепости руки Твоея, Спасе, ныне остах аз: но раны Твоя удалил еси от мене, молитвами неискусобрачно Рождшия Тя, Слове, да не оставиши мене бурею греховною погружатися, и люте плавати, Едине Избавителю.
Неизреченнаго и Божественнаго Твоего к человеком смотрения, неописанное Слово Отчее, и образ исписанный, и богописанный победителен, ведуще неложнаго Твоего воплощения, почитаем, того лобызающе.
Уверяя человеком Господь вочеловечения Своего тайну ужасную, самописует богомужный Свой образ на убрусе, и первообразное убо вознес от горы Елеонския, на престоле спосаждает Отчи, покланятися от безтелесных Ангел. Подобию же первообразнаго нам дарова покланятися: Егоже объемлюще душею же и сердцем, почитаем, того лобызающе.
Ирмос: Отроцы в Вавилоне пещнаго пламене не убояшася, но посреде пламене ввержени, орошаеми пояху: благословен еси Господи Боже отец наших.
Слава Тебе, Боже наш, слава Тебе.
Глаголом убо всяку болезнь, Слове Божий, отгнал еси, по земли ходяй, но ко Отеческому престолу восходяй, изображением исцеляеши нашу болезнь.
Слава Тебе, Боже наш, слава Тебе.
Словом всяческая создавши и воображся в чуждее, зрака Твоего оставил есть нам свойственная, яже подъемлюще, в радости веселимся.
Слава Тебе, Боже наш, слава Тебе.
От всея души поискав свойства Твоего напечатание верный царь, якоже искаше, тако и получи, Господи, взаим обрет Божественнаго желания исполнение.
Слава: К Боговидению очи уготовим, и достойно потщимся видети образ Христов всечестный, во спасение наше.
И ныне: Осуждения древняго разрешися человечество Рождеством Твоим: Тя бо Едину небес ширшую обрет, Всенепорочная, Бог в Тя вселися.
Ирмос: За законы отеческия блаженнии в Вавилоне юноши предбедствующе, царюющаго оплеваша повеление безумное, и совокуплени имже не сваришася огнем, Державствующему достойную воспеваху песнь: Господа пойте дела и превозносите во вся веки.
Слава Тебе, Боже наш, слава Тебе.
Якоже убо лицем к лицу надеющеся Тя, Господа, прийти, вси града избраннейшии людие сретение чудесно Ти сотворяют, архиереов Божественный предводяй лик. На ихже рамех носимый и к достоянию Твоему влагаем, Щедрый, почил еси в храме Матере Твоея.
Слава Тебе, Боже наш, слава Тебе.
Уста незлобивых детей к пророкоубийственному Тя древле шествующа граду песнословяху, но сонм соборища еврейскаго беззаконный, убийственную руку вооружаше свирепеющую на Тя. Ныне же законный град, вси купно предтекшии яко Содетеля, Тя зря, радуется, приемля образ зрака Твоего.
Слава: Паче Моисея Боговидца, Богописанныя скрижали приемшаго, возвеличился еси честный местоначальниче, прием честное послание Божия Слова, блажащее Тя благочестию веровавшаго, иже никакоже виде чудодействия.
И ныне: Плоть произволивый носити, Великаго Совета Отча Ангел, во утробе Твоей, Пречистая, совершенно действовася, и Тя, Матерь, доле описа, Чистая, и истлевшее обнови человеческое естество. Егоже благословим вси яко Зиждителя, и превозносим во вся веки.
Ирмос: Странствия Владычня, и Безсмертныя Трапезы на Горнем месте, высокими умы, вернии, приидите, насладимся возшедша Слова, от Слова научившеся, Егоже величаем.
Слава Тебе, Боже наш, слава Тебе.
Изблева на Тя народ неразумный, Спасе, и вместо благодетельства безместная дерзостне Ти протяже, но мы, иже далече отстоящия, страстьми Твоими сыноположихомся.
Слава Тебе, Боже наш, слава Тебе.
Помощь на враги, благочестивым и верным подаждь царем, яко знамение плоти Твоея, якоже необоримое, Владыко, стяжавше ограждение, сими да видят спасение свое.
Слава: Образе неизменный, Отеч, Сияние славы Присносущнаго Света, печать Вышняго, Слове, Сило и Мудросте, Тя богословящим Благопременитель буди.
И ныне: Видено бысть на земли плотоносное Слово, сугубо естеством из Тебе, Всенепорочная, воздаянием Божества, в единой Ипостаси, несмесне соединився смешению, Егоже славим.