Канон на Происхождение Честных Древ Честнаго и Животворящего Креста Господня
Праздник происходит от древнего обычая, существовавшего в Константинополе: износить Честное Древо Креста на дороги и улицы для освящения мест и в отвращение болезней. Проводился обычай 1 августа, по причине частых болезней, бывавших в этом месяце.
Ирмос: Яко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную песнь пои́м, вопия́ше.
Припев: Сла́ва, Го́споди, Кресту́ Твоему́ Честно́му.
Кресту́ ве́рных спасе́нию покланя́юся, и те́пле облобыза́ю, и объе́мля вопию́: Дре́во всеблаже́нное Христо́во, ду́шу мою́ и ум просвети́, молю́ся.
Сла́ва, Го́споди, Кресту́ Твоему́ Честно́му.
Победоно́сно яви́ся на стра́сти и бе́сы, днесь зна́мение Креста́. Те́мже, ве́рнии, вси све́тло просве́щше ду́ши, ны́не облобыза́ем.
Сла́ва, Го́споди, Кресту́ Твоему́ Честно́му.
Лучеза́рная облиста́ет сия́ния Крест Честны́й и просвеща́ет ве́рно покланя́ющияся Ему днесь, освяща́я ду́ши на́ша и телеса́.
Слава: Жизнода́тельный Крест предлежа́щ, и зримь, светови́дную зарю́ препосыла́ет благода́тей; присту́пим и прии́мем просвеще́ние, весе́лие, и спасе́ние, и оставле́ние, хвале́ние Го́сподеви принося́ще.
И ныне: Пресвята́я Де́во, Яже Христа́ пло́тию ро́ждши, пострада́вшаго нас ра́ди во́лею на Кресте́, Тя блажа́щия че́стно, спаса́й мольба́ми Твои́ми.
Спаси́ от бед раби́ Твоя́, Влады́ко Многоми́лостиве, си́лою Честна́го и Животворя́щаго Креста́ Твоего́, я́ко мы усе́рдно к Тебе́ прибега́ем, ми́лостивому Влады́це, Го́споду Иису́су.
Ирмос: Несть свят, я́коже Ты, Го́споди Бо́же мой, вознесы́й рог ве́рных Твои́х, Бла́же, и утверди́вый нас на ка́мени испове́дания Твоего́.
Сла́ва, Го́споди, Кресту́ Твоему́ Честно́му.
Ору́жие дре́вле, жи́зни блаже́нное Дре́во дарова́ся храни́ти, за преслуша́ние первозда́ннаго Ада́ма. Крест же сему́ путь сотвори́.
Сла́ва, Го́споди, Кресту́ Твоему́ Честно́му.
Очи́ма, устна́ми и душа́ми, ли́цы и сердцы́, поклони́мся вси пресвято́му Кресту́ Жизнода́вца Христа́, и́мже мир весь освяща́ется.
Сла́ва, Го́споди, Кресту́ Твоему́ Честно́му.
Хра́мы Бо́гу проро́чески днесь бы́вше, покланя́ющеся Дре́ву пресвята́го Креста́, и насле́дницы Его́, со стра́хом вси того́ целу́ем.
Слава: Песносло́вим Тя, Кресте́, ве́рою моля́щиися си́ле Твое́й: изми́ нас сете́й вра́жиих, и упра́ви нас к приста́нищу всех спасе́ния, пою́щих Тя.
И ныне: Де́вою родила́ еси́ Сы́на, пре́жде Тебе́ рожде́ннаго от Отца́ пре́жде век, без Ма́тере от Бо́га, распя́таго пло́тию, да спасе́т пре́жде согре́шшия.
Спаси́ от бед раби́ Твоя́, Влады́ко Многоми́лостиве, си́лою Честна́го и Животворя́щаго Креста́ Твоего́, я́ко мы усе́рдно к Тебе́ прибега́ем, ми́лостивому Влады́це, Го́споду Иису́су.
Господи помилуй. (Трижды.) Слава, и ныне.
Крест Твой, Го́споди, освяти́ся, в нем бо быва́ют исцеле́ния немощны́м во гресе́х. Его́же ра́ди припа́даем Ти, поми́луй нас.
Ирмос: Христо́с моя́ си́ла, Бог и Госпо́дь, честна́я Це́рковь боголе́пно пое́т, взыва́ющи от смы́сла чи́ста, о Го́споде пра́зднующи.
Сла́ва, Го́споди, Кресту́ Твоему́ Честно́му.
Да кропи́т вся земля́ ра́дование, да веселя́тся древа́ дубра́вная, днесь обоже́на всечестны́м Кресто́м, сия́ющи конце́м.
Сла́ва, Го́споди, Кресту́ Твоему́ Честно́му.
Показа́вый орга́н умерщвле́ния, живоно́сно ми́рови, победотво́рное ору́жие непобеди́мое, пресла́вный Кре́сте, сердца́ на́ша просвети́.
Сла́ва, Го́споди, Кресту́ Твоему́ Честно́му.
Ты Боже́ственная побе́да, Ты соде́лование на́шего спасе́ния, Ты ве́рным соодоле́ние, и Боже́ственная же́ртва, о всечестны́й Кре́сте, пою́щия Тя освяти́.
Слава: Не́бо всей земли́ свесели́тся: страстоте́рпцы, му́ченицы, апо́столи, ду́ши пра́ведных ра́достно ны́не ра́дуются, и вся спаса́ет зри́мо предлежа́щее посреде́ жизнода́тельное Дре́во, и ве́рныя освяща́ет благода́тию.
И ныне: Вои́стинну Ты яви́лася еси́, вои́стинну родила́ еси́ Сы́на вы́шняго, на Кресте́ ру́це просте́ршаго, Де́во Ма́ти Мари́е, и мир призва́вшаго.
Спаси́ от бед раби́ Твоя́, Влады́ко Многоми́лостиве, си́лою Честна́го и Животворя́щаго Креста́ Твоего́, я́ко мы усе́рдно к Тебе́ прибега́ем, ми́лостивому Влады́це, Го́споду Иису́су.
Ирмос: Бо́жиим све́том Твои́м, Бла́же, у́тренюющих Ти ду́ши любо́вию озари́, молю́ся, Тя ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Сла́ва, Го́споди, Кресту́ Твоему́ Честно́му.
Поды́мем с ра́достию преблаже́нный Крест, в церква́х и граде́х сей предложе́нный, и поклони́мся, да долго́в прии́мем оставле́ние.
Сла́ва, Го́споди, Кресту́ Твоему́ Честно́му.
Умерщвля́ется змий лука́вый ны́не, и́же тьмы нача́льник, сия́ния не терпя́, е́же облиста́ет живоно́сный Крест, Боже́ственнаго царя́ ски́птро честно́е.
Сла́ва, Го́споди, Кресту́ Твоему́ Честно́му.
Яко пресве́тла звезда́, и я́ко би́сер благоле́пен, и пресия́нное со́лнце, вся озаря́ет земли́ концы́, Крест Госпо́день, его́же облобыза́ем.
Слава: Воскли́кните язы́цы, воспо́йте, игра́йте коле́на, и по́йте Бо́гу да́вшему Креста́ неруши́мое утвержде́ние, е́же ны́не предлежи́т: вси ве́рнии ра́дуемся, я́ко того́ ра́ди блага́я прие́млюще.
И ныне: Спасе́нию Тя нача́ло вси ве́рнии ве́дуще, ублажа́ем, Чи́стая: Ты бо пре́жде Су́щаго пло́тию родила́ еси́, хоте́нием Свои́м пригвожде́нна на Кресте́.
Спаси́ от бед раби́ Твоя́, Влады́ко Многоми́лостиве, си́лою Честна́го и Животворя́щаго Креста́ Твоего́, я́ко мы усе́рдно к Тебе́ прибега́ем, ми́лостивому Влады́це, Го́споду Иису́су.
Ирмос: Жите́йское мо́ре, воздвиза́емое зря напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли живо́т мой, Многоми́лостиве.
Сла́ва, Го́споди, Кресту́ Твоему́ Честно́му.
Яко Боже́ствен сосу́д, яко свети́льник све́тел в церква́х днесь, и в хра́мех и граде́х, Крест предлежа́щь ви́дяще, и Уясни́вшаго сего́ воспое́м.
Сла́ва, Го́споди, Кресту́ Твоему́ Честно́му.
Умерщвля́ется смерть, и уморя́ется тле́ние, и бесо́встии полцы́ отбега́ют побе́дный и стра́шный днесь предлежа́щь ви́дяще Крест Христо́в, не сме́юще прикосну́тися Ему́.
Слава: Воспева́юще Тя Бо́га, и Царя́, и Го́спода, я́ко дарова́л еси́ нам Крест, сте́ну неруши́му. Его́же ны́не облобыза́ем ра́достию, и лю́тых отбега́ем.
И ныне: Ядом змии́ным, пра́баба пи́щею, я́же во Еде́ме, пома́зася: Де́ва же, ро́ждши Нача́льника жи́зни, источи́ ми́ру нетле́ние и воскресе́ние.
Спаси́ от бед раби́ Твоя́, Влады́ко Многоми́лостиве, си́лою Честна́го и Животворя́щаго Креста́ Твоего́, я́ко мы усе́рдно к Тебе́ прибега́ем, ми́лостивому Влады́це, Го́споду Иису́су.
Господи помилуй. (Трижды.) Слава, и ныне.
Вознесы́йся на Крест во́лею, тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же, возвесели́ нас си́лою Твое́ю, побе́ды дая́ нам на сопоста́ты, посо́бие иму́щим Твое́, ору́жие ми́ра, непобеди́мую побе́ду.
Иже до тре́тияго небесе́ восхи́щен бысть в рай, и глаго́лы слы́шав неизрече́нныя и Боже́ственныя, и́хже не леть язы́ки челове́ческими глаго́лати, что гала́том пи́шет, я́ко рачи́телие писа́ний прочто́сте и позна́сте. Мне, глаго́лет, хвали́тися да не бу́дет, то́кмо во еди́ном Кресте́ Госпо́дни, на не́мже страда́в уби́ стра́сти. Того́ у́бо и мы изве́стно держи́м, Крест Госпо́день, хвалу́ вси, есть бо нам спаси́тельное сие́ Дре́во, ору́жие ми́ра, непобеди́мая побе́да.
Ирмос: Росода́тельну у́бо пещь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Сла́ва, Го́споди, Кресту́ Твоему́ Честно́му.
Спаси́тельному Дре́ву поклони́мся, Кресту́ пресвято́му, ему́же слу́жат а́нгельская вся во́инства, предлежа́ть ви́дяще, ве́рнии, источа́ющь нам освяще́ние и жизнь.
Сла́ва, Го́споди, Кресту́ Твоему́ Честно́му.
Победоно́сный яви́ся пресвяты́й Крест Живода́вца Христа́, свы́ше же бесо́в всех мно́жество отгоня́ ва́рварское шата́ние, и победи́теля явля́я во́инство на́ше.
Сла́ва, Го́споди, Кресту́ Твоему́ Честно́му.
Яко одушевле́нну Тебе́ припа́дая взыва́ю: Кре́сте мой пресвяты́й, Ты ми просвети́ ду́шу, и ум, и слух, и устне́, и язы́к, и дыха́ние, и о́чи, к путе́м Ца́рства Христо́ва.
Слава: Пое́м и сла́вим и покланя́емся, и велича́ем Твою́, Христе́, держа́ву, я́ко подаде́ нам, рабо́м Твои́м, Крест Боже́ственный, сла́дость неисчерпа́емую и храни́лище душа́м и те́лом на́шим.
И ныне: Юноши три пе́щь не опали́, рождество́ прообразу́ющи Твое́, и́бо Боже́ственный огнь Тя не опали́, всели́вся в Тя, и вся научи́в пе́ти: благослове́н Бог оте́ц на́ших.
Спаси́ от бед раби́ Твоя́, Влады́ко Многоми́лостиве, си́лою Честна́го и Животворя́щаго Креста́ Твоего́, я́ко мы усе́рдно к Тебе́ прибега́ем, ми́лостивому Влады́це, Го́споду Иису́су.
Ирмос: Ужасни́ся боя́йся не́бо, и да подви́жатся основа́ния земли́: се́ бо в мертвеце́х вменя́ется в вы́шних Живы́й, и во гроб мал странноприе́млется. Его́же о́троцы, благослови́те, свяще́нницы, воспо́йте, лю́дие, превозноси́те во вся ве́ки.
Сла́ва, Го́споди, Кресту́ Твоему́ Честно́му.
Твой Крест прообразу́я Иа́ков иногда́, на вну́ки поло́жь дла́ни преме́нно, и благослови́в их, благода́ти во язы́цех науча́я: о́троцы, благослови́те, свяще́нницы, воспо́йте, лю́дие, превозноси́те Его́ во ве́ки.
Сла́ва, Го́споди, Кресту́ Твоему́ Честно́му.
О неизрече́ннаго Твоего́, Христе́, сни́тия, и неизглаго́ланных благи́х! Воплоти́ся, и распя́т быв. Смерть прие́м, и реши́ши челове́ки от кля́твы, источи́в нетле́ние на треблаже́ннем Дре́ве, препросла́вленный Крест сей во ве́ки.
Слава: Пресвяты́й Крест, Боже́ственную побе́ду, жи́зни нача́льника, ле́сти потреби́теля, днесь похва́лим Крест всесвяты́й Госпо́день, бесо́в губи́теля, и ва́рваров прогони́теля, царе́й победотво́рца и покрови́теля.
И ныне: Гвоздьми́ пригвожде́нна Христа́, копие́м прободе́нна в нетле́нная ре́бра, тро́стием в главу́ бие́ма, же́лчь вкуша́юща зря́щи, Де́ва вопия́ше: где Твоя́ добро́та за́йде, прекра́сное Сло́во, Препрославле́нне па́че сыно́в челове́ческих?
Спаси́ от бед раби́ Твоя́, Влады́ко Многоми́лостиве, си́лою Честна́го и Животворя́щаго Креста́ Твоего́, я́ко мы усе́рдно к Тебе́ прибега́ем, ми́лостивому Влады́це, Го́споду Иису́су.
Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю же, Всечи́стая, яви́ся челове́ком Сло́во Воплоще́нно, Его́же велича́юще, с небе́сными во́и Тя ублажа́ем.
Сла́ва, Го́споди, Кресту́ Твоему́ Честно́му.
Тле́нни от преслуша́ния бы́хом, Бо́жия за́поведи престу́пницы я́вльшеся, сего́ ра́ди смерть прии́де челове́ком. Те́мже безсме́ртия процвете́ днесь побе́дный Крест Христо́в, его́же целу́ем.
Сла́ва, Го́споди, Кресту́ Твоему́ Честно́му.
Се́ Дре́во пресвято́е, кре́пкая наде́жда ве́рным яви́ся, кля́твы избавле́ние, челове́ком ра́дость, предлежи́т, облича́я тьмы нача́льника. Сему́ поклони́мся ве́рнии с весе́лием.
Слава: Нача́ло благослове́ния, и утвержде́ние христиа́н, и стена́, и тве́рдо заступле́ние, и кля́твы избавле́ние яви́ся нам Дре́во вожделе́нное, ору́жие непобеди́мое, просвети́ и освяти́ нас, покланя́ющихся Тебе́.
И ныне: Хра́ме и две́ре освяще́ния, престо́ле Бо́жий, о́блаче и све́щниче всесве́тлый, и ковче́же благода́ти, Всенепоро́чная, че́стне покланя́ющияся о́бразу честно́му единоро́днаго Твоего́ Сы́на, покры́й и сохрани́.
Спаси́ от бед раби́ Твоя́, Влады́ко Многоми́лостиве, си́лою Честна́го и Животворя́щаго Креста́ Твоего́, я́ко мы усе́рдно к Тебе́ прибега́ем, ми́лостивому Влады́це, Го́споду Иису́су.