Канон на Воспоминание явления на небе Честнаго Креста во граде Иерусалиме
Посвящен дивному знамению явившемуся во дни святой Пятидесятницы, 7 мая, в третьем часу, созерцая которое многие из иудеев и эллинов пришли к истинной вере и, приступив с покаянием ко Христу Богу нашему, приняли святое крещение.
Ирмос: Колесни́цы фарао́новы и си́лу его вве́рже в мо́ре кре́пкий в бра́нех. Воспое́м песнь но́вую, я́ко просла́вися.
Припев: Сла́ва, Го́споди, Кресту́ Твоему́ Честно́му.
Яви́л еси́ на земли́ зарю́ Креста́, и́мже диа́вола низложи́в, челове́ческий род спасл еси́, Го́споди, те́мже пое́м сла́ву Твою́.
Сла́ва, Го́споди, Кресту́ Твоему́ Честно́му.
Ра́зума непоко́рство Кресто́м Изба́витель разори́ вражду́ Отчим благоволе́нием. Пое́м Ему́ песнь но́ву, сла́вно бо просла́вися.
Слава: Яко во Еде́ме живо́тное дре́во всади́л еси́, Христе́, та́ко ски́петр победотво́рный, Крест Твой светови́дно возсия́л еси́ на го́ру святу́ю.
И ныне: Юже проро́ческий прови́де лик, я́коже дверь небе́сную и неопали́мую купину́, Тя, Де́во Ма́ти чи́стая, Бо́га ро́ждшую, позна́хом.
Спаси́ от бед раби́ Твоя́, Влады́ко Многоми́лостиве, си́лою Честна́го и Животворя́щаго Креста́ Твоего́, я́ко мы усе́рдно к Тебе́ прибега́ем, ми́лостивому Влады́це, Го́споду Иису́су.
Ирмос: Лук си́льных изнемо́же, и немотству́ющии препоя́сашася си́лою, сего́ ра́ди утверди́ся в Го́споде се́рдце мое́.
Сла́ва, Го́споди, Кресту́ Твоему́ Честно́му.
Яко щито0м, защища́еми непобеди́маго Креста́ зна́мением, Влады́ко, его́же не терпя́, ме́рзкий исчеза́ет с де́монским мно́жеством. (Дважды.)
Слава: Вся Крест Твой возвесели́, распя́таго Тя Бо́га испове́дающия, и я́ко пресве́тлою и непристу́пною красото́ю осия́.
И ныне: Ра́дуйся, Ма́ти неискусобра́чная, Бо́га Сло́ва во утро́бе Твое́й вмести́вшая, и ро́ждши воплоще́ннаго Бо́га ку́пно и Челове́ка.
Спаси́ от бед раби́ Твоя́, Влады́ко Многоми́лостиве, си́лою Честна́го и Животворя́щаго Креста́ Твоего́, я́ко мы усе́рдно к Тебе́ прибега́ем, ми́лостивому Влады́це, Го́споду Иису́су.
Господи помилуй. (Трижды.) Слава, и ныне.
Показа́вый Креста́ Боже́ственный о́браз на небеси́, су́щия на земли́ наста́вити к Твоему́ позна́нию, Христе́ Бо́же, днесь просия́ невече́рняя све́тлость, и свет лица́ Твоего́ на нас зна́менася. Того́ у́бо вси и́мамы, ве́рнии, ору́жие ми́ра, непобеди́мую побе́ду..
Ирмос: Услы́шах слух Твой, Го́споди, я́ко яви́лся еси́ на земли́, и просла́вих Твою́ си́лу.
Сла́ва, Го́споди, Кресту́ Твоему́ Честно́му.
Та́йно у́бо пе́рвее, чу́вственно же днесь, просия́л еси́, Христе́, пречи́стаго Креста́ Твоего́ о́браз.
Сла́ва, Го́споди, Кресту́ Твоему́ Честно́му.
Беззако́нных богоуби́йц де́рзость, кре́стным о́бразом просвети́в, изобличи́л еси́, Спа́се Ще́дре.
Слава: Утверди́л еси́ христиа́нскую ве́ру невеще́ственным Твои́м све́том, Крест нам, Христе́, начерта́в.
И ныне: Ма́ти чи́стая, благослове́нная Влады́чице, Его́же родила́ еси́, Бо́га моли́твами Твои́ми ми́лостива сотвори́ нам.
Спаси́ от бед раби́ Твоя́, Влады́ко Многоми́лостиве, си́лою Честна́го и Животворя́щаго Креста́ Твоего́, я́ко мы усе́рдно к Тебе́ прибега́ем, ми́лостивому Влады́це, Го́споду Иису́су.
Ирмос: Возсия́вый свет, и просвети́вый у́тро, и показа́вый день, сла́ва Тебе́, сла́ва Тебе́, Иису́се Сы́не Бо́жий.
Сла́ва, Го́споди, Кресту́ Твоему́ Честно́му.
Смертоно́сное дре́во во Еде́ме Ада́му, дре́вле преступи́вшему, смерть принесе́; Крест же Живоно́сный, ны́не я́влься, ми́ра просвети́ концы́.
Сла́ва, Го́споди, Кресту́ Твоему́ Честно́му.
Соста́вивый сло́вом первозда́нное сия́ние, я́ко Сы́ну Отец, Крест ны́не светоза́рен напису́ет, Распе́ншемуся свиде́тельствуя Божество́.
Слава: Во све́те незаходи́ме превы́спренний свет, во Отце у́зрим ве́рою, Христе́, Тя, Сы́на, и Твой Дух, душа́м на́шим просия́н.
Ныне: Боле́зней ма́терних, Отрокови́це, не позна́ла еси́, преесте́ственно заче́нши Бо́га и ро́ждши пло́тию, те́мже Тя вси досто́йно сла́вим.
Спаси́ от бед раби́ Твоя́, Влады́ко Многоми́лостиве, си́лою Честна́го и Животворя́щаго Креста́ Твоего́, я́ко мы усе́рдно к Тебе́ прибега́ем, ми́лостивому Влады́це, Го́споду Иису́су.
Ирмос: Внегда́ скорбе́ти ми, возопи́х ко Го́споду, и услы́ша мя Бог спасе́ния моего́.
Сла́ва, Го́споди, Кресту́ Твоему́ Честно́му.
Да покры́ются у́бо о́чи беззако́нных, кре́стныя добро́ты блиста́ющия не могу́ще зре́ти. (Дважды.)
Слава: Да насладя́тся заре́ю пречи́стаго Креста́ Бо́га ве́дящии, на Дре́ве распе́ншагося пло́тию.
И ныне: Яже Бо́га ро́ждшая, Де́во неискусобра́чная, о нас не преста́й Сы́на Твоего́ моля́щи.
Спаси́ от бед раби́ Твоя́, Влады́ко Многоми́лостиве, си́лою Честна́го и Животворя́щаго Креста́ Твоего́, я́ко мы усе́рдно к Тебе́ прибега́ем, ми́лостивому Влады́це, Го́споду Иису́су.
Господи помилуй. (Трижды.) Слава, и ныне.
Отве́рзый небеса́ заключе́нная, на небеси́ пресве́тлыя лучи́, на земли́ возсия́ пречи́стый Крест. Те́мже сия́ние его́ де́йства прие́мше, к незаходи́мому наставля́емся све́ту, и во бра́нех и́мамы его́ ору́жие ми́ра, непобеди́мую побе́ду.
Зна́мение се стра́шное вели́каго Бо́га ви́де вели́кий Константи́н и слы́шаше глаго́лющу в нем Иису́су, пе́рвее глаго́лавшу царю́ христиа́н ве́рных самодержа́вному: да́же у́бо до втора́го прише́ствия сий, твоему́ гра́ду достоя́ние сохраня́я, пребу́дет и да́же до сконча́ния, и гра́дом всем первоседа́ние. Стена́ же тому́ бу́дет Крест, ору́жие ми́ра, непобеди́мая побе́да.
Ирмос: Спасы́й во огни́ авраа́мския Твоя́ о́троки и халде́и уби́в, я́же пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.
Сла́ва, Го́споди, Кресту́ Твоему́ Честно́му.
Возне́сшееся на Крест Со́лнце в полу́дне, Его́же зря́ще чу́вственное со́лнце, лучи́ своя́ скры; препе́тый Го́споди, Бо́же оте́ц на́ших, благослове́н еси́.
Сла́ва, Го́споди, Кресту́ Твоему́ Честно́му.
Богови́дцу во огни́ дре́вле бесе́дова и мра́це, крестоявле́нным же блиста́нием я́ко Бог сла́вим днесь: препе́тый Го́споди, Бо́же оте́ц на́ших, благослове́н еси́.
Слава: От Све́та и во све́те Свет соприсносу́щный сия́я и пречи́стым Твои́м све́том Креста́ Твоего́ побе́ду показа́л еси́. Препе́тый Го́споди, Бо́же оте́ц на́ших, благослове́н еси́.
И ныне: Несказа́нно во утро́бе и преесте́ственно прие́мшую непреме́ннаго Бо́га, за милосе́рдие к челове́ком прише́дшаго, благоче́стно воспое́м я́ко Ма́терь Бо́га на́шего во ве́ки.
Спаси́ от бед раби́ Твоя́, Влады́ко Многоми́лостиве, си́лою Честна́го и Животворя́щаго Креста́ Твоего́, я́ко мы усе́рдно к Тебе́ прибега́ем, ми́лостивому Влады́це, Го́споду Иису́су.
Ирмос: Во о́бразе Ангела, я́вльшагося в пещи́ о́гненней песносло́вцем, Христа́ Бо́га по́йте, о́троцы, свяще́нницы, благослови́те, лю́дие, превозноси́те во вся ве́ки.
Сла́ва, Го́споди, Кресту́ Твоему́ Честно́му.
На престо́ле сла́вы ви́дена бы́вша и на Дре́ве Кре́стнем пригвожде́на существо́м пло́ти, по́йте, о́троцы, свяще́нницы, благослови́те, лю́дие, превозноси́те во вся ве́ки.
Сла́ва, Го́споди, Кресту́ Твоему́ Честно́му.
Све́том пречи́стым вообра́жшаго на кра́ниеве Крест, на горе́ святе́й, по́йте, о́троцы, свяще́нницы, благослови́те, лю́дие, превозноси́те во вся ве́ки.
Слава: Славосло́вяще еди́наго от Тро́ицы, заре́ю Кре́стною вселе́нную просвеща́юща, по́йте, о́троцы, свяще́нницы, благослови́те, лю́дие, превозноси́те во вся ве́ки.
И ныне: Неизрече́нно и без се́мене заче́ншую и ро́ждшую ра́дость вселе́нныя, Христа́ Бо́га, по́йте, о́троцы, свяще́нницы, благослови́те, лю́дие, превозноси́те во вся ве́ки.
Спаси́ от бед раби́ Твоя́, Влады́ко Многоми́лостиве, си́лою Честна́го и Животворя́щаго Креста́ Твоего́, я́ко мы усе́рдно к Тебе́ прибега́ем, ми́лостивому Влады́це, Го́споду Иису́су.
Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́, тем, веселя́щеся, Тя, Богоро́дице, велича́ем.
Сла́ва, Го́споди, Кресту́ Твоему́ Честно́му.
Дре́вле во огни́ же и мра́це непокори́вым узако́нивый, ны́не же ве́рным Твои́м лю́дем Креста́ Твоего́ о́браз начерта́л еси́, па́че свети́л сия́ющ, его́же досто́йно велича́ем.
Сла́ва, Го́споди, Кресту́ Твоему́ Честно́му.
Пла́кася тьмо́ю тварь распе́нших Тя де́рзости, ны́не же благоле́пнейшим све́том живоно́сный просия́ Крест Твой, Христе́, церко́вную показу́я сокрове́нную красоту́.
Слава: О Тебе́ упова́ние возвы́сивше, бога́тии лю́дие Твои́ Тебе́ на мольбу́ Крест и стра́шную Кровь Твою́ предлага́ют, но благопребы́тно пода́ждь нам, Сло́ве Бо́жий, избавле́ние.
И ныне: Просвети́ нас, ро́ждшая Свет непристу́пный, Де́во, и испо́лни нас весе́лия, и ра́дости, и Боже́ственнаго ра́зума, чи́стым се́рдцем Тя благоразу́мно велича́ющия.
Спаси́ от бед раби́ Твоя́, Влады́ко Многоми́лостиве, си́лою Честна́го и Животворя́щаго Креста́ Твоего́, я́ко мы усе́рдно к Тебе́ прибега́ем, ми́лостивому Влады́це, Го́споду Иису́су.