Канон об усопших — Глас пятый

Ирмос: Спасителю Богу, в мори люди немокрыми ногами наставльшему, и фараона со всевоинством потопльшему, Тому Единому поим, яко прославися.

Припев: Дивен Бог во святых Своих, Бог Израилев (поклон).

Божественною любовию страстотерпцы Христовы мучителей гордыню попраша; преставленным же верою милостивное просят оставление и покой.

Покой, Господи, души усопших раб Твоих (поклон) .

Во святых селениих, во дворех Твоих, Христе, преставленныя всели, Иже долг за них пролиявый кровь Твою, Владыко, пречестнейшую.

Слава: Премудрость Божия, Иже известно начертание все носяй Родителево: ихже прият, Щедре, Сам упокой, подавая им присносущное блаженство.

И ныне: Светоносная сень, златовидный ковчег, Божественное Слово обдержащи, воплощенное нас ради и разорившее смертную силу, явилася еси, Всенепорочная.

Ирмос: Утверди ны, Боже Спасе, Твоею силою, и воздвигни рог Твоея Церкве, правоверно хвалящих Тя.

Дивен Бог во святых Своих, Бог Израилев.

Мужески подвигшеся, страдальцы, мучительским стремлением противу сташа и молятся о усопших Христу.

Покой, Господи, души усопших раб Твоих.

Законы Твоими воспитавшихся, преставльшихся, Преблагий, в светлых Твоих селениих прием, упокой.

Слава: Милостивый Едине Боже, яже избрал еси, сподоби святых светлостей, презирая тех согрешения.

И ныне: Поем Твое Рождество, Чистая, Имже перваго осуждения и клятвы избавихомся и от смерти свободихомся.

Господи, помилуй (трижды).

Воистинну суета всяческая, житие же сень и соние, ибо всуе мятется всяк земнородный, якоже рече Писание: егда мир приобрящем, тогда во гроб вселимся, идеже вкупе царие и нищии. Темже, Христе Боже, преставльшихся упокой, яко человеколюбец.

Слава и ныне, Богородичен: Всесвятая Богородице, во время живота моего не остави мене, человеческому предстательству не ввери мя, но Сама заступи и помилуй мя.

Ирмос: Услышах, Господи, из гроба Твое востание, и прославих Твою непобедимую силу.

Дивен Бог во святых Своих, Бог Израилев.

Соприсносущна Тя Отцу исповедавше благочестно мученицы, Христе, убиени быша и вопиют Ти: избави, ихже приял еси, рабы Твоя.

Покой, Господи, души усопших раб Твоих.

Иже в мертвецех бывый един свободь мертвец, Христе, и мертвецем жизнь вечную даруя, покой даждь ныне преставленым рабом Твоим.

Слава: Пришедый во еже спасти заблуждшия, Христе, райскаго сподоби вселения, яже преставил еси в вере, оправдавый благодатию.

И ныне: Осени Тя Вышнего, Отроковице, сила, в Тебе рай содела животный, древо имуще посреде, Ходатая и Господа.

Ирмос: Утренююще вопием Ти, Господи, спаси ны, Ты бо еси Бог наш, разве бо Тебе иного не знаем.

Дивен Бог во святых Своих, Бог Израилев.

Мученик прием, Господи, моления, души, яже преставил еси, со избранными Ти причти.

Покой, Господи, души усопших раб Твоих.

Предрекл еси, не узрети смерти верующим в Тя; темже, Владыко, усопшия упокой.

Слава: Красоты дому Твоего, Господи, Твоя рабы улучити сподоби и сладкаго причастия.

И ныне: Слово, Еже Отцу соприсносущное, от Девы воплощься, умертви смертию смерть.

Ирмос: Обыде мя бездна, гроб мне кит бысть, аз же возопих к Тебе, Человеколюбцу, и спасе мя десница Твоя, Господи.

Дивен Бог во святых Своих, Бог Израилев.

Воинство мученик Твоих, вышним силам подобящеся, Христе, молят Тя, подаждь, Человеколюбче, преставленным еже от Тебе наслаждение.

Покой, Господи, души усопших раб Твоих.

В местех прохлаждения, в местех святых светлости, в местех ослабления, Христе, яко человеколюбец, ихже приял еси, учини рабы Твоя.

Слава: Очисти рабы Твоя и тем согрешений прощение подаждь, Человеколюбче, и жизни сподоби нетленней, и блаженному наследию.

И ныне: Зачатия безсеменнаго Твоего кто словом изрещи может чудесе, Всенепорочная: Бога бо родила еси, за милосердие к нам пришедша.

Господи, помилуй (трижды). Слава и ныне.

Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.

Сам един еси Безсмертный, сотворивый и создавый человека; земнии убо от земли создахомся и в землю туюжде пойдем, якоже повелел еси создавый мя и рекий ми: яко земля еси и в землю отыдеши, аможе вси человецы пойдем, надгробное рыдание творяще песнь: аллилуия, аллилуия, аллилуия.

Ирмос: В пещи огненней песнословцы спасый отроки, благословен Бог отец наших.

Дивен Бог во святых Своих, Бог Израилев.

Ныне неприступнаго света насытитися подаждь, Спасе, преставленым, мольбами страстотерпец Твоих.

Покой, Господи, души усопших раб Твоих.

В Церкви первенец, Христе, в вере скончавшихся, Щедре, сопричти.

Слава: Украшены одеждами нетления Твоя рабы, преставленыя к Тебе, Спасе, упокой.

И ныне: Ток смертнаго существа отсекла еси, Пречистая, жизнь без семене заченши, Всенепорочная.

Ирмос: Из Отца прежде век рожденнаго Сына и Бога и в последняя лета воплощеннаго от Девы Матере, священницы пойте, людие превозносите во вся веки.

Дивен Бог во святых Своих, Бог Израилев.

Иже святых мученик подвиги приемый и тех ради упокояяй в вере Твоей усопшия, Тебе, Спасе, поем, и превозносим во вся веки.

Покой, Господи, души усопших раб Твоих.

Премирныя Твоея славы сиянием озарятися яже от нас преставленыя сподоби, яко благоутробен, Тебе, Спасе, поющия и превозносящия во вся веки.

Слава: С лики святых, ихже преставил еси, учини, и Аврааму в недрех с Лазарем причти Тебе, Спасе, поющих, и превозносящих во вся веки.

И ныне: Украшена добротою чистоты, Дево Мати, добротворнаго благолепия жилище бывши; темже Тя поем и превозносим Чистую во вся веки.

Ирмос: Тя, паче ума и словесе Матерь Божию, в лето Безлетнаго неизреченно рождшую, вернии единомудренно величаем.

Дивен Бог во святых Своих, Бог Израилев.

Страданий священных мученицы, воздаяния приемше, даровати Тя ныне молят, верою преставленым, Спасе, ослабление.

Покой, Господи, души усопших раб Твоих.

Умерщвление претерпел еси, Едине Спасе Безсмертне, иже воскресение мертвым подая, яко благоутробен, и безсмертия светлость.

Слава: Исправил еси нас, падших в смерть, и на живот вечный надеятися научил еси, егоже улучити Твоим рабом, Спасе, даруй.

И ныне: Закона сени преидоша рождеством Твоим, истина возсия, благодать даровася, Богородице; темже Тя величаем.

Достойно есть яко воистинну блажити Тя, Богородицу, присноблаженную и пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем (поклон).

скачать канон