Канон об усопших — Глас шестой

Ирмос: Яко по суху пешешествовав Израиль, по бездне стопами, гонителя фараона видя потопляема, Богу победную песнь поим, вопияше.

Припев: Дивен Бог во святых Своих, Бог Израилев (поклон).

В Небесных Чертозех, всегда доблии мученицы молят Тя, Христе, ихже от земли преставил еси верныя, вечных благ получити сподоби.

Покой, Господи, души усопших раб Твоих (поклон) .

Украсивый всяческая, животное смешенное мя человека, посреде смирения же вкупе и величества создал еси, темже раб Твоих души, Спасе, упокой.

Слава: Рая жителя, и делателя в начале мя учинил еси, преступивша же Твою заповедь изринул еси. Темже рабов Твоих души, Спасе, упокой.

И ныне: Иже от ребра создавый Еву первее, нашу праматерь, из пречистаго Твоего чрева в плоть одевается; еюже смерти крепость, Чистая, разрушил есть.

Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

Дивен Бог во святых Своих, Бог Израилев.

Законно пострадавше Твои мученицы, Жизнодавче, и венцы победы украсившеся от Тебе, прилежно преставльшимся верным вечное ходатайствуют почестие.

Покой, Господи, души усопших раб Твоих.

Наказав прежде многими чудесы и знаменьми мене, заблуждшаго, напоследок Самого Себе истощил еси, яко сострадателен, и, поискав, обрел и спасл еси.

Слава: От текущаго непостоятельныя тли к Тебе пришедшия в селениих вечных вселитися радостно сподоби, Блаже, оправдав верою же и благодатию.

И ныне: Несть непорочны, якоже Ты, Пречистая Богомати, едина бо от века истиннаго Бога зачала еси во чреве, смерти разрушившаго силу.

Господи, помилуй (трижды).

Воистинну суета всяческая, житие же сень и соние, ибо всуе мятется всяк земнородный, якоже рече Писание: егда мир приобрящем, тогда во гроб вселимся, идеже вкупе царие и нищии. Темже, Христе Боже, преставльшихся упокой, яко человеколюбец.

Слава и ныне, Богородичен: Всесвятая Богородице, во время живота моего не остави мене, человеческому предстательству не ввери мя, но Сама заступи и помилуй мя.

Ирмос: Христос моя сила, Бог и Господь, честная Церковь благолепно поет, взывающи, от смысла чиста о Господе празднующи.

Дивен Бог во святых Своих, Бог Израилев.

Премудрости большее являя познание и о дарех многосовершенную, Владыко, благостыню, мученическия лики Ангелом сочетал еси.

Покой, Господи, души усопших раб Твоих.

Пречистую славу Твою получити сподоби к Тебе преставленным, идеже, Христе, веселящихся есть жилище, и глас чистаго радования.

Слава: Поющия приими Божественною державою Твоею, ихже от земли прият, чада свету тех соделав, греховную мглу очищая, Многомилостиве.

И ныне: Приятелище пречистое, церковь непорочную, ковчег всесвят, девственное место священия, Тебе, доброту Иаковлю, Владыка избрал есть.

Ирмос: Божиим светом Твоим, Блаже, утренюющих Ти души любовию озари, молюся: Тя ведети, Слове Божий, истиннаго Бога, от мрака греховнаго взывающа.

Дивен Бог во святых Своих, Бог Израилев.

Яко всеплодие священное и яко начаток человеческаго естества, мученицы, прославленному принесшеся Богу, нам спасение присно ходатайствуют.

Покой, Господи, души усопших раб Твоих.

Небеснаго пребывания и раздаяния дарований сподоби, Господи, прежде усопшия верныя рабы Твоя, подая прегрешений избавление.

Слава: Иже един естеством животворец, Иже благости воистинну неизследимая пучина, скончавшияся Царствия Твоего сподоби, Щедре, Едине Безсмертне.

И ныне: Крепость и пение, Иже из Тебе, Владычице, миру рождейся, и спасение бысть погибшим, иже от адовых врат избавляя верою Тебе блажащия.

Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Дивен Бог во святых Своих, Бог Израилев.

На Кресте пригвождаем, мученическия лики к Себе собрал еси, подобящияся Страсти Твоей, Блаже. Темже Тя молим: к Тебе преставленныя упокой.

Покой, Господи, души усопших раб Твоих.

Неизреченною славою Твоею, егда приидеши страшно судити миру всему на облацех, благоволи, Избавителю, светло срести Тебе, яже от земли приял еси, верныя рабы Твоя.

Слава: Источник жизни сый, Владыко, в мужестве Божественнем, окованныя изводя рабы Твоя, яже к Тебе верно отшедшия, в пищи райстей всели.

И ныне: В землю возвратихомся, преступивше Божию заповедь; Тебе же ради, Дево, на небеса от земли вознесохомся, тлю смертную оттрясше.

Господи, помилуй (трижды). Слава и ныне.

Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.

Сам един еси Безсмертный, сотворивый и создавый человека; земнии убо от земли создахомся и в землю туюжде пойдем, якоже повелел еси создавый мя и рекий ми: яко земля еси и в землю отыдеши, аможе вси человецы пойдем, надгробное рыдание творяще песнь: аллилуия, аллилуия, аллилуия.

Ирмос: Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших.

Дивен Бог во святых Своих, Бог Израилев.

Избавльшиися Твоею кровию мученицы перваго преступления, окропившеся же своею кровию, прообразуют яве Твое заколение; благословен еси, Боже отец наших.

Покой, Господи, души усопших раб Твоих.

Свирепеющую пещь умертвил еси, Слове Живоначальнейший, в вере же Твоей усопшия приими, Тебе поющия, Христе, и глаголющия: благословен еси Бог отец наших.

Слава: Воодушив мя, человека, вдохновением Божественным, Богоначальнейший Владыко, преставленныя Царствия Твоего сподоби, пети Тебе, Спасе: благословен Бог отец наших.

И ныне: Превышши всех тварей, Пренепорочная, была еси, заченши Бога, сокрушившаго смертная врата, и вереи стершаго. Темже Тя, Чистая, песнословим, вернии, яко Богоматерь.

Ирмос: Из пламене преподобным росу источил еси, и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.

Дивен Бог во святых Своих, Бог Израилев.

Крепко подвиги показующе, победы венцы приясте, мученицы страстотерпцы, Христови зовуще: Тя превозносим, Господа, во веки.

Покой, Господи, души усопших раб Твоих.

Священно верныя, житейская оставльшия и к Тебе, Владыце, отлучившияся, приими кротко и упокой, яко милосерд, Тя превозносящих Господа во веки.

Слава: Ныне на земли кротких всем водворятися прежде усопшим, Спасе, благоволи, верою Твоею оправдав и благодатию, Тя превозносящих, Господа, во веки.

И ныне: Блажим Тя вси, Преблаженная, яко Слово воистинну Сущее Блаженное Рождшую, плоть бывшее нас ради, Егоже превозносим во вся веки.

Ирмос: Бога человеком невозможно видети, на Негоже не смеют чини ангельстии взирати; Тобою же, Всечистая, явися человеком Слово воплощенно, Егоже величающе, с небесными вои Тя ублажаем.

Дивен Бог во святых Своих, Бог Израилев.

Надежда мучеников лики укрепи, и к Твоей любви распалением впери, будущий сим предвообразивши непоколебимый воистинну покой; егоже преставленныя, Блаже, верныя сподоби.

Покой, Господи, души усопших раб Твоих.

Светлое Твое, Христе, и Божественное улучити сияние верою преставленным благоволи, иже в лонех Авраамовех покой, яко един милостив, тем даруя, и вечнаго сподобляя блаженства.

Слава: Иже сый естеством благ и милосерд, и хотитель милостей, и благоутробия пучина, ихже от места сего озлобления и сени смертныя преставил еси, идеже сияет Твой Свет, Спасе, тех учини.

И ныне: Сень святую, Чистая, вемы Тя, и ковчег, и скрижали, закона и благодати: Тебе бо ради оставление даровася, оправданным кровию Воплощеннаго из Твоего чрева, Всенепорочная.

Достойно есть яко воистинну блажити Тя, Богородицу, присноблаженную и пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем (поклон).

скачать канон