Канон об усопших — Глас седьмой

Ирмос: Манием Твоим на земный образ преложися, прежде удоборазливаемое водное естество, Господи; темже немокренно пешешествовав, Израиль поет Тебе песнь победную.

Припев: Дивен Бог во святых Своих, Бог Израилев (поклон).

Доброта украшенная добродетельными образы, и Божественное возложение различными красотами, сияюще благочестием, мученицы, Христу Богу принесостеся.

Покой, Господи, души усопших раб Твоих (поклон) .

Зарю неприступнаго и трисолнечнаго сияния улучити сподоби преставльшияся рабы Твоя, многомилостиве Господи, отнюдуже отбеже всяка болезнь, и печаль, и воздыхание.

Слава: Умерщвлением осужденное естество, Живот ипостасный, Жизнодавче Сам сый, Христе, воздвигл еси; темже яко един щедр, верою к Тебе преставльшияся упокой.

И ныне: Исправила еси, Пречистая, праматернее падение, рождши Господа Слова, сию воскресившаго, и сущим во гробех вдохнувша живот, властию Божественною.

Ирмос: В начале небеса всесильным словом Твоим утверждей, Господи Спасе, и Вседетельным и Божиим Духом всю силу их: на недвижимем мя камени исповедания Твоего утверди.

Дивен Бог во святых Своих, Бог Израилев.

Юношеско и крепко теpпение, мужественне показаша мученик лицы, pан бо устремление подъяша и мучений язвы, нетленныя Твоея славы, Спасе, желающе и красоты.

Покой, Господи, души усопших раб Твоих.

В вечный Твой живот, яже в надежди усопших, Милостиве, приими души: и желаемых и Божественных, Владыко, недр Божественнаго Авраама внутрь всели и с Лазаpем блаженным сопричти.

Слава: Сошедый с небес, во еже спасти pод человеческий, благоутробный Спасе, невещественнаго света и Божественныя славы Твоея насыщатися и pрадости благочестно преставленныя Твоим милосердием сподоби.

И ныне: Законы естества разрешишися в Тебе, непостижимое Слово заченшей, Чистая, и закон нам Божественный дадеся, всем оставление подая отчаяваемым прегрешеньми, благодатию Божественныя любве.

Господи, помилуй (трижды).

Воистинну суета всяческая, житие же сень и соние, ибо всуе мятется всяк земнородный, якоже рече Писание: егда мир приобрящем, тогда во гроб вселимся, идеже вкупе царие и нищии. Темже, Христе Боже, преставльшихся упокой, яко человеколюбец.

Слава и ныне, Богородичен: Всесвятая Богородице, во время живота моего не остави мене, человеческому предстательству не ввери мя, но Сама заступи и помилуй мя.

Ирмос: Отча недра не оставль, и сошед на землю, Христе Боже, тайну услышах смотрения Твоего, и прославих Тя, Едине Человеколюбче.

Дивен Бог во святых Своих, Бог Израилев.

Страдальческия болезни терпеливно показавше, Христе, мученицы венцы увязошася правды Твоея, и славят Твою силу.

Покой, Господи, души усопших раб Твоих.

Пачеестественныя светлости Твоея преставленыя благочестно сподоби, егда приидеши во славе Твоей со Ангелы Твоими, Всещедре и Многомилостиве.

Слава: Трисветлыя зари, Блаже, и единственнаго облистания Божества насладитися сподоби прежде отшедшия, и славящия Тя, Человеколюбче.

И ныне: Иже Отца недра не оставль, в девических недрех Христос водворися и смерти избавил есть Тебе блажащия, Богомати, едина всепетая.

Ирмос: Господи, Боже мой, от нощи утреневав, Тебе молюся: подаждь ми оставление прегрешений моих и к свету Твоих повелений пути моя направи молюся.

Дивен Бог во святых Своих, Бог Израилев.

Мертвостию живоносною, истканную мучений ради, всехвальнии мученицы одеяни светло, душам прежде усопшим Божественный испросите покой.

Покой, Господи, души усопших раб Твоих.

От неизнуримых сокровищ проливаяй благоутробие, Спасе, души, яже преставил еси, с первородными Твоими в жилищах небесных благоволи водворитися.

Слава: Тяготу отложившия, и от уз разрешившияся, и к вышнему животу рабы Твоя прешедшия, Христе, наслаждатися Твоих святых светлостей, Спасе, благоволи.

И ныне: Владычице Богомати, моих согрешений разрешение подаждь и даруй ми прощение грехов моих, яже жизнь ипостасную миру рождши, Всенепорочная.

Ирмос: Плавающаго в молве житейских попечений, с кораблем потопляема грехи и душетленному зверю приметаема, яко Иона, Христе, вопию Ти: из смертоносныя глубины возведи мя.

Дивен Бог во святых Своих, Бог Израилев.

Лик мученический, неудобь носимыя болезни крепко претерпевший, неболезненныя сладости наследова, правды венцы от живоносныя десницы прием.

Покой, Господи, души усопших раб Твоих.

Преставленыя от нас верныя рабы Твоя ликом избранных сопричтав, Блаже, упокой, Господи, вся тех согрешения презирая за милосердие.

Слава: С праведными, идеже святых лицы и идеже светлость преподобных и вечныя жизни наслаждение, прежде усопшия Твоя рабы учини, Милостиве, яко Бог безсмертен.

И ныне: Иже волею Божественною и содетельною силою вся составлей от небытия, из утробы Твоея, Чистая, произыде, и сущия во тьме смертней Богоначальными блистаньми просветила еси.

Господи, помилуй (трижды). Слава и ныне.

Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.

Сам един еси Безсмертный, сотворивый и создавый человека; земнии убо от земли создахомся и в землю туюжде пойдем, якоже повелел еси создавый мя и рекий ми: яко земля еси и в землю отыдеши, аможе вси человецы пойдем, надгробное рыдание творяще песнь: аллилуия, аллилуия, аллилуия.

Ирмос: Пещь отроцы огнепальну, древле росоточащу, показаша, Единаго Бога воспевающе, и глаголюще: превозносимый отцев Бог и препрославлен.

Дивен Бог во святых Своих, Бог Израилев.

Венцы носяще лицы мученик, Царя Христа ясно обстоят мысленно, со ангельскими ликостояньми, благословен еси, зовуще, Боже отец наших.

Покой, Господи, души усопших раб Твоих.

Ты смерти и живота власть имеяй, Щедре, пищи Божественныя сподоби яже в вере Твоей, Спасе, преложенныя, благословен еси, зовущия, Боже отец наших.

Слава: Просвещая светом невещественнаго светолития, Христе, души, яже преставил еси, в селениих небесных всели славословити Тя непрестанно со угодники Твоими.

И ныне: Иже прежде без матере из Отца, ныне же без отца из Тебе, Дево, Христос неизреченно родися, нас ради человек, в плоть оболкся; благословен, Пречистая, плод Твоего чрева.

Ирмос: Единаго безначальнаго Царя Славы, Егоже благословят небесныя силы, и трепещут чини ангельстии, пойте и превозносите Его во веки.

Дивен Бог во святых Своих, Бог Израилев.

К небесней зряще славе мученицы Христова пришествия, о земней нерадиша славе, поюще благочестно Того яко Царя, во вся веки.

Покой, Господи, души усопших раб Твоих.

Иже земную разрушивый храмину, еже о надежди жизни усопшим небесную храмину подаждь, в праведных селениих сих упокой во вся веки.

Слава: Мертвым воскресение яко Бог подаваяй, Иже источник жизни имый: Ты напой пищными потоки, яко един благ, прежде усопшия, во вся веки.

И ныне: Свет неприступный, Богородице Дево, во чреве Твоем приемши неизреченно, просветила еси сущия во тьме жития славити благочестно Христа, прошедшаго из Тебе несказанно.

Ирмос: Мати Божия и Дева, рождшая и девствующая паки, не естества дело, но Божия снизхождения; тем яко едину Божиих чудес сподобльшуюся, Тя присно величаем.

Дивен Бог во святых Своих, Бог Израилев.

Явленно доблии мученицы просвещают мир, веры суще столпи, Церквам непоколебимая твердыня и предградия благочестия; тех по достоянию, вернии, ублажаем.

Покой, Господи, души усопших раб Твоих.

Избави огня вечнаго, Владыко, от нас преставльшияся, ребр Твоих копием греховное рукописание растерзав сих, яко един человеколюбец, и святых светлости сподоби.

Слава: Яко благ Бог, и человеколюбец естеством, яко милостив и щедр, яко живота безсмертнаго сый сокровище неистощимое, Спасе, верою прежде усопшия нетленныя сладости Твоея сподоби.

И ныне: Закона сени, и преждняя гадания Твоим рождеством преидоша, ибо исполнение закона и пророков Христос бысть; Егоже во двою существу поюще, Тебе, Приснодеву Чистую, ублажаем.

Достойно есть яко воистинну блажити Тя, Богородицу, присноблаженную и пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем (поклон).

скачать канон