Канон об усопших — Глас восьмой

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Припев: Дивен Бог во святых Своих, Бог Израилев (поклон).

Смертию смерть Христову, и страстьми Страсть подражавше честную, мученицы вси Божественныя и блаженныя жизни получиша.

Покой, Господи, души усопших раб Твоих (поклон) .

Юности прегрешения презря и грехи превосходя, Христе Спасе, прежде усопшия рабы Твоя со избранными Твоими сопричти.

Слава: Юже получиша славу же и радость, иже блаженное стяжавше пребывание, подаждь богатно Твоим рабом, яже приял еси, Многомилостиве.

И ныне: Зачала еси Слово Отчее, плоти соединившееся по ипостаси, Еже из Тебе, всенепорочная Отроковице, ад Божественною силою упразднившее.

Ирмос: Небеснаго круга Верхотворче Господи, и Церкви Зиждителю, Ты мене утверди в любви Твоей, желаний краю, верных утверждение, Едине Человеколюбче.

Дивен Бог во святых Своих, Бог Израилев.

Очистившеся древняго прародительнаго падения крещением и паки порождением, струями же кровей своих окропившеся, Христу, блаженнии, сцарствуете.

Покой, Господи, души усопших раб Твоих.

Иже мертв волею положься во гробе и живущия во гробех взываяй, Спасе, благоволи, яже от нас приял еси, в селениих праведных Твоих сим водворятися.

Слава: Благоутробием Божественныя Твоея, Владыко, и соестественне разумеваемыя благости умолен бывая, грехов разрешение подав рабом Твоим, Спасе, упокой.

И ныне: Воплощься из чрева Твоего, и быв Человек, Иже изрядне сый един человеколюбец, спасает человека от врат смертных, Богомати Пречистая, едина всепетая.

Господи, помилуй (трижды).

Воистинну суета всяческая, житие же сень и соние, ибо всуе мятется всяк земнородный, якоже рече Писание: егда мир приобрящем, тогда во гроб вселимся, идеже вкупе царие и нищии. Темже, Христе Боже, преставльшихся упокой, яко человеколюбец.

Слава и ныне, Богородичен: Всесвятая Богородице, во время живота моего не остави мене, человеческому предстательству не ввери мя, но Сама заступи и помилуй мя.

Ирмос: Ты моя крепость, Господи, Ты моя и сила, Ты мой Бог, ты мое радование, не оставль недра Отча, и нашу нищету посетив. Тем с пророком Аввакумом зову Ти: силе Твоей слава, Человеколюбче.

Дивен Бог во святых Своих, Бог Израилев.

Да Твоея, Владыко, славы узрят, и светлость Твою светодательную на небесех получат светло, всяк вид мучений носити претерпеша мученицы Божественнии, Тебе, Христе, поюще: силе Твоей слава, Человеколюбче.

Покой, Господи, души усопших раб Твоих.

Многи обители у Тебе, Спасе, суть, по достоянию всем разделяемы, по мере добродетелей: тыя убо, Щедре, исполнити сих сподоби, яже верою преставльшияся, благочестно Тебе вопиющия: силе Твоей слава, Человеколюбче.

Слава: Равен нам человек явился еси, Безсмертне, всем равно смерть претерпел еси и жизни показал еси путь, еяже преставльшияся сподоби, яко человеколюбец, прощение согрешений, яко Владыка подавая, и света причастие даруй.

И ныне: Ты верных похвала еси, Безневестная, Ты предстательница и Ты прибежище христиан: стена и пристанище, к Сыну Твоему мольбы носиши, Всенепорочная, и спасаеши от бед иже верою и любовию Богородице Чистую Тя ведущия.

Ирмос: Вскую мя отринул еси от лица Твоего, Свете незаходимый, и покрыла мя есть чуждая тьма, окаяннаго; но обрати мя и к свету заповедей Твоих пути моя направи, молюся.

Дивен Бог во святых Своих, Бог Израилев.

Несказанныя Твоея славы и еже паче слова Твоего блаженства, в селениих святых, идеже глас красен празднующих, преставленныя к безстрастней жизни, ущедрив, сподоби, Едине Человеколюбче.

Покой, Господи, души усопших раб Твоих.

Идеже чини ангельстии, идеже праведных собори радуются, Авраама в недрех всели, Спасе, рабы Твоя, и со дерзновением страшному и Божественному Престолу предстати благоволи, Благоутробне.

Слава: Очищение нам явился еси, правда же и избавление, и язвою Твоею наша немощи уврачевал еси. Ты убо, Щедре, яко благ, преставльшияся в сладости райстей учини.

И ныне: Милостивно, Милостиве, человечества меру восприял еси, Иже Божественныя славы превышшими украшаяй возвышеньми, от Девических ложесн плоть прием одушевлену, словесну, еюже смерть погубил еси.

Ирмос: Очисти мя, Спасе, многа бо беззакония моя, и из глубины зол возведи, молюся, к Тебе бо возопих, и услыши мя, Боже спасения моего.

Дивен Бог во святых Своих, Бог Израилев.

Мученицы Твои, Спасе, многия муки претерпеша, любовию Твоею душами уязвившеся святии, Твоея желающе присносущныя славы и сладкаго Твоего причастия.

Покой, Господи, души усопших раб Твоих.

Чрево врага смертию растерзал еси, Спасе, и вся яже в нем юзники воскресил еси, живот даровавый, егоже преставленныя, Благодетелю, сподоби.

Слава: Слез и воздыхания сущия во аде рабы Твоя свободи, Спасе: яко един бо благоутробен, отъял еси всякую слезу от всякаго лица верно благословящих Тя.

И ныне: Иже естеством Содетель, содетельствуется в ложеснах Твоих, полный, яко Бог, истощавается, Всенепорочная: един Безсмертный, за всех спасение умирает смертию.

Господи, помилуй (трижды). Слава и ныне.

Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.

Сам един еси Безсмертный, сотворивый и создавый человека; земнии убо от земли создахомся и в землю туюжде пойдем, якоже повелел еси создавый мя и рекий ми: яко земля еси и в землю отыдеши, аможе вси человецы пойдем, надгробное рыдание творяще песнь: аллилуия, аллилуия, аллилуия.

Ирмос: Отроцы еврейстии в пещи попраша пламень дерзновенно и на росу огнь преложиша, вопиюще: благословен еси, Господи Боже, во веки.

Дивен Бог во святых Своих, Бог Израилев.

Все желание мучеников простреся ко единому Владыце, любовию Тому соединяемое, и поющее: благословен еси, Господи Боже, во веки.

Покой, Господи, души усопших раб Твоих.

Подаеши верою преставльшимся светлость Божественнаго Царствия, нетления одежду даруяй вопиющим: благословен еси, Господи Боже, во веки.

Слава: Исполни радости и веселия яже преставил еси рабы Твоя, Щедре, сподобивый их взывати Тебе и пети: благословен еси, Господи Боже, во веки.

И ныне: Разрешая Евину клятву, в пренепорочную вселился еси Деву, благословения источник источая вопиющим: благословен, Пречистая, Плод Твоего чрева.

Ирмос: Мусикийским органом согласующим и людем безчисленным, покланяющимся образу в Деире, три отроцы не повинувшеся, Господа воспеваху и славословляху во вся веки.

Дивен Бог во святых Своих, Бог Израилев.

Земленыя подвиги прошедше, небесныя прияша венцы мученицы истиннии, вопиюще Ти непрестанно: Господа пойте и превозносите Его во вся веки.

Покой, Господи, души усопших раб Твоих.

Сошед в ров преисподнейший, иже во гробех живущия воскресил еси живоначальною дланию и подал еси рабом Твоим, верою прежде усопшим покой, Щедре.

Слава: Яко источник жизни присносущныя, яко сладости сый поток, рабы Твоя, благочестно к Тебе преставленныя сподоби пети и славословити Тя во вся веки.

И ныне: Марие Дево Богородице, яже Бога Спаса человеком рождшая телесно, спасай верою поющия Твое Рождество, и превозносящия во вся веки.

Ирмос: Устрашися всяк слух неизреченна Божия снизхождения, яко Вышний волею сниде даже и до плоти, от Девическаго чрева быв Человек. Темже Пречистую Богородицу, вернии, величаем.

Дивен Бог во святых Своих, Бог Израилев.

Имуще, мученицы Христовы, непобедимую крепость, и неодолеемую, уничижисте мучителей безбожное веление, и Царствия Небеснаго яве сподобистеся, просвещаеми Троичными зарями, достохвальнии.

Покой, Господи, души усопших раб Твоих.

Разрушися ад горький, разрушившу Ти его, Человеколюбче, и воскресившу яже от века тамо спящия; но и ныне, яко благ, прешедшия к Тебе, Благоутробне, невечерняго света Твоего сподоби.

Слава: Весь еси, Спасе, сладость, весь еси желание и любовь воистинну ненасытная, весь еси доброта несказанная, преставльшияся убо к Тебе, Твоея красоты наслаждатися благоволи и Божественныя доброты Твоея сподоби.

И ныне: Спаси мя, Мати Божия, рождшая Христа Спаса моего, Бога и Человека, сугуба естеством, не ипостасию: единородна убо от Отца, из Тебе же первородна всея твари; Егоже в сугубом естестве величаем.

Достойно есть яко воистинну блажити Тя, Богородицу, присноблаженную и пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем (поклон).

скачать канон